YUĞ Dövlət Teatrında “Mən-Dədə Qorqud: Epizod 1. Başlanğıc” tamaşasının premyerası keçirilib
Dekabrın 2-də YUĞ Dövlət Teatrında “Mən-Dədə Qorqud: Epizod 1. Başlanğıc” tamaşasının premyerası baş tutub. Səhnə əsəri “Kitabi-Dədə Qorqud” dastanının “Dirsə xan oğlu Buğac” boyu əsasında hazırlanıb.
Azərbaycan Dövlət Milli Gənc Tamaşaçılar Teatrında nümayiş olunan tamaşanın quruluşçu rejissoru Azərbaycan Dövlət YUĞ Teatrının baş rejissoru Mikayıl Mikayılovdur.
Tamaşada rolları YUĞ Teatrının aktyorları, Əməkdar artist Qasım Nağı (Dədə Qorqud), Mətanət Abbaslı (Ozan Ana), Vüqar Hacıyev (Ozan Ata) və Amid Qasımov (Ozan Oğul) ifa edirlər.
“Mən-Dədə Qorqud” layihəsi YUĞ Teatrının yaradıcısı, görkəmli rejissor Vaqif İbrahimoğlunun 75 illiyinə həsr olunub. Layihə çərçivəsində “Kitabi-Dədə Qorqud” dastanının 12 boyu əsasında yeni tamaşaların hazırlanması nəzərdə tutulur. Hər bir tamaşaya Vaqif İbrahimoğlunun teatr məktəbini keçmiş tələbə-rejissorlar quruluş verəcək.
Qeyd edək ki, “Mən-Dədə Qorqud: Epizod 1. Başlanğıc” tamaşası ilk dəfə oktyabrın 16-da Meksikanın Metepek şəhərində keçirilən Kimera Beynəlxalq İncəsənət və Mədəniyyət Festivalında nümayiş etdirilib.
Ayan Sədi
18:58 04.12.2025
Oxunuş sayı: 1055
