Azərbaycan, Türkiyə və digər türk dövlətlərinin mediasının birgə fəaliyyəti doğru və dəqiq məlumatların yayılmasına vacib töhfə ola bilər- RƏY
Azərbaycan Türk Dövlətləri Təşkilatı (TDT) çərçivəsində media sahəsində əməkdaşlığın dərinləşdirilməsi istiqamətində aktiv fəaliyyət göstərir. Bu baxımdan, TDT-nin Media və İnformasiya üzrə məsul nazirlərinin və yüksək vəzifəli rəsmilərinin VII toplantısında Azərbaycanın media strategiyasının və təşəbbüslərinin önəmli rolu bir daha diqqət mərkəzinə çıxıb. Azərbaycan Respublikasının Medianın İnkişafı Agentliyinin İcraçı direktoru Əhməd İsmayılov bildirib ki, ölkəmiz Türk dünyasının media əməkdaşlığının gücləndirilməsinə xüsusi önəm verir və bu sahədə ardıcıl təşəbbüslər həyata keçirir.
Ə.İsmayılovun sözlərinə görə, Azərbaycan yalnız milli medianın inkişafına deyil, eyni zamanda, dezinformasiya və hibrid informasiya təhdidlərinə qarşı mübarizə sahəsində TDT-nin platforması üzərindən fəal əməkdaşlıq edir. Ölkənin media sahəsindəki tədbirləri, o cümlədən Azərbaycan Milli Mətbuatının yubileyi, Şuşa Media Forumu və “Media savadlılığı” layihəsi, jurnalistlərin peşəkarlığının artırılması və informasiya suverenliyinin qorunması istiqamətində mühüm addımlar kimi qiymətləndirilir.
Məsələ ilə bağlı Yurd.Media saytının təsisçisi və baş redaktoru Murad Əliyev Crossmedia.az-la öz fikirlərini bölüşüb:
“Bu gün bütün Türk dünyasında media inkişaf edir. Bu, həm də həmin ölkələrin iqtisadi güclənməsinin göstəricisidir. Məsələn, Qazaxıstan, Özbəkistan, Türkiyə və Azərbaycanın media orqanları sürətli transformasiyalardan keçir. Bu prosesdə süni intellekt və digər texnoloji imkanlar əməliyyatları sadələşdirir.
Belə bir şəraitdə Azərbaycan mediasının istər Orta Asiyada yerləşən türk dövlətləri ilə, istər Türkiyənin mediası ilə daha sıx əlaqələri olduqca vacibdir. Bu, bir neçə səbəbdən zəruridir. İlk növbədə, zaman-zaman qərbdəki bəzi dairələr feyk məlumatlar və qərəzli informasiyalar vasitəsilə informasiya mühitini manipulyasiya etməyə çalışır. Bu vəziyyətdə Azərbaycan, Türkiyə və digər türk dövlətlərinin mediasının birgə fəaliyyəti doğru və dəqiq məlumatların yayılmasına vacib töhfə ola bilər".
O, həmçinin kadr potensialının inkişafı üçün qarşılıqlı əlaqələrin çox faydalı olduğunu bildirib: "Məsələn, jurnalistlərimiz Türkiyə və ya digər ölkələrdə təlimlərdə iştirak etdikdə, geri qayıtdıqda yeni öyrəndikləri bilik və təcrübələri tətbiq etməyə çalışırlar. Eyni zamanda, türkiyəlilər də Azərbaycana gələrək burada bir çox məsələləri öyrənirlər. Beləliklə, kadrların yetişdirilməsi sahəsində qarşılıqlı əməkdaşlıq böyük əhəmiyyət kəsb edir".
Elmir Heydərli
21:17 29.11.2025
Oxunuş sayı: 999
