TDT daxilində media sahəsində ortaq layihələrin həyata keçirilməsi artıq zərurətə çevrilib - Rəy
Türk dünyasında media və informasiya sahəsində əməkdaşlığın dərinləşdirilməsi istiqamətində atılan addımlar regionun kommunikasiya mühitinin gələcəyini formalaşdıran strateji proseslərdən biri kimi dəyərləndirilir. Türk Dövlətləri Təşkilatının Media və İnformasiya üzrə məsul nazirlərinin və yüksək vəzifəli rəsmilərinin VII toplantısı isə bu istiqamətdə yeni bir mərhələnin başlanğıcı hesab olunur. Türkiyə Prezident Administrasiyasının İctimaiyyətlə Əlaqələr Departamentinin rəhbərinin müavini Ferhat Pirinççinin sözlərinə görə, keçirilən toplantı türk dövlətləri arasında media sahəsində güclü, məqsədyönlü və institusional əməkdaşlığın qurulması üçün mühüm platforma rolunu oynayır.
Bu görüş həm regional informasiya təhlükəsizliyinin təmin edilməsi, həm də dezinformasiya ilə mübarizədə vahid yanaşmanın formalaşdırılması baxımından xüsusi əhəmiyyət kəsb edir. Bununla yanaşı, Türk Dünyasının tarixi, mədəni və dil birliyindən qaynaqlanan əməkdaşlıq ruhu toplantının konseptual əsasını təşkil edir və gələcək birgə təşəbbüslər üçün möhkəm zəmin yaradır.
Mövzu ilə bağlı Azərbaycan Respublikası Mətbuat Şurasının İdarə Heyətinin üzvü Hacıbəy Heydərli Crossmedia.az-la öz fikirlərini bölüşüb:
"Düşünürəm ki, dezinformasiya və feyk xəbərlərlə mübarizə təkcə Türk Dövlətləri Təşkilatının üzv ölkələri üçün deyil, bütövlükdə dünya ölkələri üçün ən aktual məsələlərdən birinə çevrilib. Bu məsələ son dövrlərdə ölkələri yaxından maraqlandırır və onları birgə fəaliyyət göstərməyə məcbur edir.
Təbii ki, Türk Dövlətləri Təşkilatında da bütün sahələrdə əməkdaşlıq yüksək səviyyədədir. Media sahəsində də dezinformasiyaya və feyk xəbərlərə qarşı mübarizə, həmçinin süni intellektin inkişafı ilə ortaq layihələrin həyata keçirilməsi artıq zərurətə çevrilib. Bu baxımdan, mən bu təklifi müsbət qiymətləndirirəm.
Türkiyənin bu sahədə ayrıca praktiki təcrübəsi var. Türkiyədə dezinformasiyaya qarşı mübarizə mərkəzi fəaliyyət göstərir və bu yalnız media ilə məhdudlaşmır. Sosial şəbəkələr – Facebook, X, TikTok, Instagram və digər platformalarda yayılan dezinformasiyalar həmin mərkəz tərəfindən dərhal ictimaiyyətə bildirilir və beləliklə, yanlış məlumatların yayılmasının qarşısı alınır".
O, həmçinin Türkiyənin bu nümunəsindən istifadə etməklə, Türk Dövlətləri Təşkilatına üzv ölkələr birgə layihələr həyata keçirə biləcəyinidə qeyd edib:
"Azərbaycanda və dünyanın bir çox ölkəsində də artıq bu istiqamətdə tədbirlər görülür. Xüsusilə media savadlılığı layihələri böyük əhəmiyyət kəsb edir. Media savadlılığı, cəmiyyətin dezinformasiyaya və feyk xəbərlərə qarşı immunitetini formalaşdırır. Azərbaycanda gələn həftədən Media Savadlılığı Həftəsinə start veriləcək və bu, ölkədəki cəmiyyətin informasiya sahəsində savadlılığını artıracaq.
Beləliklə, Türk Dövlətləri Təşkilatının ortaq platformasında bir araya gəlmək həm Azərbaycan üçün təcrübə paylaşımı baxımından faydalı olacaq, həm də Azərbaycan həmin platformada güclü iştirakçılardan biri olacaq".
Elmir Heydərli
17:30 29.11.2025
Oxunuş sayı: 2254
