TDT-də jurnalistlər birliyinin yaradılması çox önəmlidir - Açıqlama
Türk Dövlətləri Təşkilatı (TDT) informasiya məkanında qarşılıqlı əməkdaşlığı genişləndirmək və media sahəsində institusional əlaqələri gücləndirmək istiqamətində yeni təşəbbüslərlə çıxış edir. Təşkilat çərçivəsində Jurnalistlər Birliyinin yaradılması ilə bağlı səsləndirilən fikir isə bu sahədə əlaqələndirmənin daha sistemli, peşəkar və davamlı şəkildə aparılmasına xidmət edən mühüm addım kimi dəyərləndirilir. TDT-nin Media və İnformasiya üzrə məsul nazirlərinin və yüksək vəzifəli rəsmilərinin VII toplantısında çıxış edən Baş katibin müavini Ömer Kocaman bildirib ki, təşkilat hazırda 55 müxtəlif istiqamətdə fəaliyyət göstərir və qarşıda duran əsas prioritetlərdən biri media əməkdaşlığının institusional səviyyəyə yüksəldilməsidir.
Onun sözlərinə görə, informasiya texnologiyalarının sürətli inkişafı həm yeni imkanlar yaradır, həm də yalan xəbərlərin artması kimi çağırışları gündəmə gətirir. Bu baxımdan TDT çərçivəsində dezinformasiya ilə mübarizədə formalaşdırılan əməkdaşlıq mexanizmləri, eləcə də media qurumları arasında əlaqələndirmə qrupunun yaradılması mühüm əhəmiyyət daşıyır. Yeni yaradılması nəzərdə tutulan Jurnalistlər Birliyi isə bu sahədə əməkdaşlığın daha da möhkəmlənməsinə xidmət edəcək.
Məsələ ilə bağlı "Şərq" qəzetinin Baş redaktoru, Əməkdar jurnalist Akif Aşırlı Crossmedia.az-la öz fikirlərini bölüşüb:
"Təbii ki, Türk dünyasının birliyi və onun gücləndirilməsi bizim üçün, xüsusən Azərbaycan üçün çox önəmli və vacibdir. Biz özümüzü güc mərkəzi olaraq həm digər beynəlxalq təşkilatlarda, həm də Türk Dövlətləri Təşkilatında görürük. Bu təşkilatda iştirakımız həm gücümüzü, həm də birliyimizi nümayiş etdirmək baxımından əhəmiyyətlidir.
Eyni dildə danışan və eyni soykökə malik bir millətin birliyi hər zaman vacibdir. Bu birliyin qorunmasında əsas rol media və jurnalistikadır. Müasir texnologiyalar, internetin sürətli inkişafı və informasiya strukturlarının çevik mexanizmlərinin yaradılması jurnalistlərin fəaliyyətini daha da önəmli edir. Bu baxımdan, Türk Dövlətləri Təşkilatında jurnalistlər birliyinin yaradılması xüsusi əhəmiyyət kəsb edir.
Təəssüf ki, dil və mədəni əlaqələrimiz keçmişə nisbətən zəifləyib. XIX əsrin sonu və XX əsrin əvvəllərində Azərbaycan mətbuatında Kırım tatarlarının da, Osmanlı Türkiyəsində yaşayan və fəaliyyət göstərən yazıçıların da iştirakı olmuşdur. Orta Türkistandan olan yazarlar da Azərbaycan mətbuatında fəaliyyət göstərmişdir. Jurnalistlərimiz Baxta Sarayda çıxan tərcümə qəzetlərində sərbəst şəkildə öz fikirlərini ifadə edirdilər.
Lakin təəssüf ki, bu gün soruşsaq, jurnalistlərimizdən bəzilərinin Kırımda və ya Türkiyədə hansısa məqaləsi çap olunubmu, cavabımız çox vaxt “yox” olacaq. Yəni, bir-birimizlə əlaqələrimiz zəifdir və bu əlaqələrin gücləndirilməsi vacibdir".
O, həmçinin Türk Dövlətləri Təşkilatında jurnalistlər birliyinin yaradılmasının çox önəmli olduğunu qeyd edib.
"Lakin burada bir məqamı qeyd etməliyəm: əgər bu birlik yalnız rəsmi informasiya strukturlarının nümayəndələrindən ibarət olacaqsa, onun müsbət təsiri olmayacaq. Müstəqil, müxtəlif fikirlərə malik jurnalistlərin və uzun müddətdir türkçülük yolunda mübarizə aparan yazarların bu birliyə daxil olması vacibdir.
Yalnız belə olduqda Türk Dövlətləri Təşkilatında jurnalistlər birliyinin təsiri real və faydalı olacaq. Əks halda, rəsmi strukturların nümayəndələrini bir araya gətirmək heç bir cəmiyyət üçün fayda gətirməyəcək və təşkilat daxilində müsbət nəticələr əldə edilməyəcək".
Elmir Heydərli
17:31 29.11.2025
Oxunuş sayı: 1563
