TDT-yə üzv ölkələrin mediaları arasında daha genişmiqyaslı ortaq layihələr həyata keçirilə bilər- RƏY
Bakıda Türk Dövlətləri Təşkilatının Media və İnformasiya üzrə işçi qrupunun 12-ci iclası keçirilir. Toplantıda 2025-ci il Fəaliyyət Planının icra vəziyyəti müzakirə olunur və sənədin 2026-cı ilə uyğunlaşdırılaraq yenilənməsi nəzərdə tutulur. Həmçinin Kommünike layihəsi və növbəti toplantının yeri ilə bağlı təkliflər ətrafında fikir mübadiləsi aparılır.
Bu iclas TDT ölkələri arasında media sahəsində əməkdaşlığın daha da güclənməsinə mühüm töhfə verir. Fəaliyyət planlarının yenilənməsi regional informasiya mühitində daha çevik və koordinasiyalı addımlar atmağa imkan yaradacaq. Müxtəlif ölkələrin media rəsmilərinin bir araya gəlməsi isə vahid media strategiyasının formalaşmasına şərait yaradır.
Baş verən proseslər barədə Mətbuat Şurası İdarə Heyətinin üzvü Hacıbəy Heydərli Crossmedia.az- açıqlamasında bildirib.
O deyib ki, Bakıda Türk Dövlətləri Təşkilatının Media və İnformasiya İşçi Qrupunun iclasının keçirilməsi çox vacib bir addımdır: "Düşünürəm ki, Bakıda Türk Dövlətləri Təşkilatının Media və İnformasiya İşçi Qrupunun iclasının keçirilməsi çox vacib bir addımdır. Bundan öncə də bu işçi qrupunun görüşləri keçirilib və bugün, türk dünyası təşkilatına üzv olan ölkələrin mediaları arasında çox sıx iş birliyi mövcuddur. Azərbaycan media qurumları TDT ölkələri ilə çox sıx əməkdaşlıq edir. Bir çox ortaq layihə həyata keçirilib. Bu baxımdan növbəti iclasın Bakıda keçirilməsi və Bakının bu təşəbbüsdə öncü rol oynaması çox sevindirici bir amildir. Təbii ki, Azərbaycan təkcə TDT ilə məhdudlaşmır. Bundan öncə də, bilirsiniz ki, D-8-ə üzv olan ölkələrin Media Forumu Bakıda keçirildi və Azərbaycan dünyada media sahəsində olan qlobal dəyişikliklərə yaxından töhfə verən, ortaq layihələri həyata keçirmək istəyən bir ölkədir. Türk Dövlətləri Təşkilatı da tarixdə heç zaman bu günkü qədər bir olmayıb və bu ölkələrin mediaları arasında çox böyük perspektiv var. Ortaq layihələr həyata keçirmək üçün çox münbit bir mühit mövcuddur".
"Çünki bizi ortaq dil, ortaq mədəniyyət, ortaq din birləşdirir və belə olan təqdirdə, düşünürəm ki, növbəti mərhələlərdə TDT-yə üzv ölkələrin mediaları arasında daha genişmiqyaslı ortaq layihələr həyata keçirilə bilər. Eyni zamanda, ortaq media məkanı kimi onların bir araya gəlməsi artıq zəruridir. Bilirsiniz ki, Türk Dövlətləri Təşkilatına üzv olan QDT-lərin həmrəliyi forumu keçirildi və ondan sonra ortaq qərar alındı ki, TDT-yə üzv olan ölkələrin QDT-ləri birləşsin. Təbii ki, media sahəsi də bundan kənarda qala bilməz.Düşünürəm ki, medianın da bu sahədə çox böyük perspektivi var. Türk Dövlətləri ilə əlaqəsi olan və bu ölkələrdə aktiv fəaliyyət göstərən azərbaycanlı jurnalistlər də bu platformada təmsil olunmalıdır. Onlar da öz ideyalarını, fikirlərini orada bildirməlidirlər. Belə olan təqdirdə, Azərbaycan və TDT-yə üzv digər ölkələrin jurnalistləri daha geniş çaplı ortaq layihələr həyata keçirə bilərlər. Azərbaycan bütün bu təşəbbüsləri dəstəkləyən və icra edən bir ölkə kimi Türk dövlətlərinin media qurumlarının vahid platformada, ortaq media məkanında bir araya gəlməsində çox böyük töhfə verə bilər. Azərbaycanın bunun üçün hər cür şəraiti var. Onsuz da TDT ölkələrini bir araya gətirən, ən çox dəstək verən və məkan təqdim edən ölkələrdən biridir. Bu ideya Azərbaycan tərəfindən irəli sürülsə, əminəm ki, digər ölkələr də bunu dəstəkləyəcək və növbəti mərhələdə ortaq mediamız fəaliyyətə başlaya bilər".
Ülvi Zahidov
13:03 27.11.2025
Oxunuş sayı: 1824
