Problemli kreditlərin həcmində artım istehlak kreditləri üzrə yüksəkdir — AÇIQLAMA
Son 5 ildə adambaşına düşən kredit həcmi nəzərəçarpacaq dərəcədə artıb. Belə ki, 2020-ci ildə adambaşına düşən kredit həcmi 566 manat olduğu halda, 2025-ci ilin ilk altı ayı üzrə bu göstərici 1301 manata yüksəlib. Eyni zamanda, əhalinin ümumi gəlirlərində kreditin payı da 11 faizdən 17 faizə qalxmışdır ki, bu da borcun gəlir strukturu üzərindəki təsirinin gücləndiyini ortaya qoyur. Xüsusilə istehlak kreditləri sahəsində müşahidə olunan sürətli artım bu tendensiyanın əsas hərəkətverici qüvvəsidir. Bütün bunlar isə potensial risklərin qiymətləndirilməsini zəruri edir.
Mövzu ilə bağlı Crossmedia.az-a açıqlama verən iqtisadçı Eldəniz Əmirov bildirib ki, “kredit yükü” ifadəsi bəzi media qurumlarında və müəyyən dairələrdə səsləndirilsə də bu əslində yük deyil:
“Kredit — istər sahibkarların, istərsə də vətəndaşların, ümumilikdə fiziki və hüquqi şəxslərin birbaşa maliyyə təminatının həyata keçirilməsi üçün mühüm bir alətdir. Azərbaycan müstəqillik qazandığı gündən bu günə qədər ölkədə kredit portfelinin həcmi davamlı olaraq artmaqdadır. Bir vaxtlar 10 milyard manat olan kredit portfeli artıq bir neçə ildir ki, 20 milyardı keçib. Davamlı olaraq bu artım baş verməkdədir. Çünki iqtisadi inkişaf eyni zamanda subyektlərin kreditə müraciət etməsini zərurətə çevirir. Bəs burada narahatlıq doğuran məqam varmı? Bəli, var. Burada problem istehlak kreditləri ilə bağlıdır. Belə ki, istehlak kreditlərindəki artım tempi digər kredit növləri üzrə artım tempini davamlı şəkildə üstələyir. Əsas narahatlıq isə ondan ibarətdir ki, problemli kreditlərin həcmində olan hissədə artım dinamikası məhz istehlak kreditləri üzrə daha yüksəkdir. Yəni, istehlak kreditləri daxilində problemli kreditlərin həcmi digərləri ilə müqayisədə daha yuxarı paya malikdir. Təbii olaraq növbəti ildə də artım dinamikası davam edəcək. Biz bunu hansısa formada saxlamağa cəhd etməməliyik. Bu, bazarın qanunudur və bunu düşünmək belə doğru deyil. Sadəcə olaraq risklərin düzgün qiymətləndirilməsinə ehtiyac var ki, perspektivdə problemli kreditlərin həcmi artmasın”.
Nəzrin Salmanova
14:56 30.08.2025
Oxunuş sayı: 1163
