Kərbəlanın ruhunda vəhdət, qardaşlıq və birlik var - AÇIQLAMA
Qafqaz Müsəlmanları İdarəsinin Qazılar Şurası 2025-ci ildə Məhərrəm ayının başlanması ilə bağlı rəsmi fətva verib. Şamaxı Astrofizika Rəsədxanasının hesablamalarına əsasən, Hicri-qəməri təqvimi ilə 1447-ci ilin ilk günü — Məhərrəm ayının 1-i iyunun 26-na, Aşura günü isə iyulun 5-nə təsadüf edəcək.
Məhərrəm ayı ərzində ölkənin müxtəlif bölgələrində moizələr, ehsan süfrələri, qanvermə aksiyaları və maarifləndirici tədbirlər təşkil olunur. Bu tədbirlər həm dini dəyərlərin yaşadılması, həm də cəmiyyətin mənəvi birliyinin gücləndirilməsi baxımından əhəmiyyət daşıyır.
Mövzu ilə bağlı Crossmedia.az-a açıqlama verən ilahiyyatçı Ağa Hacıbəyli ilk olaraq bildirib ki, Məhərrəm ayı İslam tarixində böyük əhəmiyyətə malikdir:
“Bu ay hicri-qəməri təqviminin başlanğıcıdır və hər il İslam dünyasında yeni bir tarixi mərhələni müjdələyir. Allah bu yeni tarix ümmət və bütün bəşəriyyət üçün xeyirli və mübarək etsin. Etiraf etmək lazımdır ki, günümüzdə insanlarımız dini baxımdan yetərincə maarifləndirilmir. İslam dini bəzən doğru qaynaqlardan öyrədilmir, çünki XXI əsr media əsridir və bu dövrdə İslam aləminə yönəldilən çoxsaylı qeyri-dəqiq, çirkli məlumatlar haqqla batil bir-birinə qarışdırılır. Məhz bu səbəbdən ölkəmizdə İslamı dərindən bilən, vətəninə, millətinə və dövlətinə bağlı şəxslərin bu mövzularda daha fəal olması zəruridir. Cəmiyyətimiz informasiya müharibəsində milli və mənəvi dəyərlərimizi qorumaq üçün daha ayıq və təşəbbüskar olmalıdır. Ümid edirik ki, bu istiqamətdə daha səviyyəli, daha intellektual yanaşmalar formalaşacaq və dəyərlərimiz daha doğru şəkildə aşılanacaq”.
A.Hacıbəyli vurğulayıb ki, Kərbəla bir məktəbdir, bir çağırışdır:
“Kərbəla məktəbi çərçivəsində keçirilən məclislər bizləri qəzəbə yox, mərhəmətə; nifrətə yox, ədalətə; parçalanmaya yox, birliyə dəvət etməlidir. Əsas istiqamət bu olmalıdır. Çünki Kərbəlanın ruhunda vəhdət, qardaşlıq və birlik var. Həm hüzn, həm də şəhadət bu məktəbin ayrılmaz hissəsidir. Bu ayda şəhidlərin xatirəsi yad edilməlidir. Xüsusilə ölkəmizin dörd bir yanında şəhadət şərbətini içərək haqq dərgahına yüksələn şəhidlərimiz bir daha ehtiramla anılmalıdır. Onların fədakarlıqları, mübarizə dolu yolları və əzmkarlıqla apardıqları mücadilələr dilə gətirilməlidir. Bu bir günlə məhdudlaşmamalıdır; çünki şəhidlər bizim həyat yolumuzun öncülləri, qaranlıq zamanların işıq saçan zaatlarıdır. Ona görə də “Şəhidlər ölməzdir” (Ali-İmran surəsi 169-cu ayə) Allahu Təala belə buyurur”.
İlahiyyatçı həmçinin bu cür önəmli məsələlərdə bəzən Azərbaycan dövlətçiliyinə qarşı sui-istifadə cəhdlərinə də münasibət bildirib:
“Ayıq-sayıq vətəndaş olmaq hər birimizin vəzifəsidir. Azərbaycanın bir dövləti, bir bayrağı və bir vətəni var. Bu dövlət bizim üçün müqəddəsdir. Ona yönəlmiş təhdidlər haradan gəlirsə gəlsin – məqsədi milli və mənəvi birliyimizi sarsıtmaqdır. Bu baxımdan Azərbaycan cəmiyyətinin, ailəsinin, gəncliyinin qorunması hər bir vətəndaşın ümdə borcudur. Ümid edirik ki, Məhərrəm ayı boyunca veriləcək xütbələr, vaazlar və nəsihətlər Azərbaycanın din xadimləri tərəfindən təqdim ediləcək. Onlar həm də insanlara doğru istiqaməti göstərmək, milli və mənəvi dəyərlərimizin düzgün aşılanmasına töhfə verəcək. Xüsusilə Kərbəla faciəsinin mahiyyətinin doğru izah olunması bu məclislərin önəmli vəzifələrindən biri olmalıdır. Necə ki, xalqımız Xocalı faciəsini böyük ağrı və dərdlə xatırlayır və ona layiq yanaşır, eləcə də Kərbəla hadisəsi bir məktəb olaraq, bir məbəd, bir dərgah və bir ruh olaraq cəmiyyətimizə dərin mənalarla çatdırılmalıdır”.
Nəzrin Salmanova
19:45 23.06.2025
Oxunuş sayı: 11350
