İran XİN: “ABŞ-nin nüvə obyektlərinə hücumu ağır nəticələrə yol açacaq”
İranın xarici işlər naziri Abbas Əraqçı ABŞ-nin İranın nüvə obyektələrinə endirdiyi hava zərbələrindən sonra kəskin açıqlama verib.
Crossmedia.az xəbər verir ki, nazir sosial şəbəkə hesabında yaydığı bəyanatda BMT və onun üzv dövlətlərini baş verənlərə qarşı təcili reaksiya verməyə çağırıb.
“Birləşmiş Millətlər Təşkilatının Təhlükəsizlik Şurasının daimi üzvü olan ABŞ bu səhər İranın Fordo, Natanz və İsfahan şəhərlərində yerləşən dinc nüvə obyektələrinə hücum edərək BMT Nizamnaməsini, beynəlxalq hüququ və Nüvə Silahlarının Yayılmaması Müqaviləsini kobud şəkildə pozub. Bu səhər baş verən hadisələrin çirkin və qalıcı nəticələri olacaq. BMT-nin hər bir üzvü bu son dərəcə təhlükəli, qanunsuz və cinayətkar davranışdan təşvişə düşməlidir”, – Əraqçı bildirib.
Nazir əlavə edib ki, Tehran beynəlxalq hüquqa uyğun şəkildə özünü müdafiə etmək hüququnu saxlayır:
“İran öz suverenliyini, maraqlarını və xalqını müdafiə etmək üçün bütün vasitələrdən istifadə etmək hüququnu özündə saxlayır”.
Xatırladaq ki, bu gün səhər ABŞ-nin İranın Fordo, Natanz və İsfahanda yerləşən bir neçə nüvə obyektəsinə aviazərbələr endirməsi bölgədə gərginliyi daha da artırıb.
Aybəniz Səfərova
09:30 22.06.2025
Oxunuş sayı: 8984
