ABŞ-də İranla müharibəyə qarşı mövqe sərtləşir
ABŞ-də həm sol, həm də mühafizəkar siyasi spektrin tanınmış simaları Ağ Evin İranla mümkün müharibə planlarına qarşı çıxış edirlər.
Crossmedia.az xəbər verir ki, Demokrat Partiyasının sol fraksiyasının lideri, yəhudi əsilli senator Berni Sanders İrana hərbi müdaxilə ehtimalını kəskin tənqid edib. O, administrasiyanı Tehranla dialoqa qayıtmağa çağırıb:
“Bütün ağlı başında olanları İrana müdaxilədən yayınmağa çağırıram. Bizə daha bir İraq avantürası lazım deyil. İranla razılıq mümkündür, danışıqları pozan Netanyahudur. Bu, yəhudilərin savaşı deyil – Netanyahunun savaşıdır”, – deyə Sanders vurğulayıb.
Sandersin fikirlərinə ABŞ-nin sağ-mühafizəkar düşərgəsində də dəstək verənlər var.
Populyar televiziya aparıcısı, “Fox News” şərhçisi Tuker Karlson da Ağ Evi İrana qarşı mümkün hərbi əməliyyatlardan çəkindirməyə çağırıb:
“Əgər Kəşfiyyat rəhbərliyi deyirsə ki, İran nüvə silahına malik deyil, o zaman bu müharibə niyə lazımdır? Amerikalılar daha bir Yaxın Şərq bataqlığına girməməlidir. Mən Ağ Evi İranla dialoqu bərpa etməyə çağırıram”, – deyə o bildirib.
Bu çağırışlarla yanaşı, ABŞ Konqresində İrana qarşı mümkün hərbi əməliyyatların hüquqi əsaslarını məhdudlaşdırmaq üçün yeni qanun layihəsi təqdim olunub.
Respublikaçı senator Tomas Massie və Demokrat konqresmen Ro Khanna Ağ Evin Konqresin təsdiqi olmadan Tehrana qarşı birtərəfli hərbi əməliyyata başlamasını qadağan edən qanun layihəsi üzərində birlikdə çalışıblar.
20:28 18.06.2025
Oxunuş sayı: 9715
