Rafael Paris Aviasiya Sərgisində stendin bağlanmasına görə Fransanı məhkəməyə verir
İsrailin müdafiə sənayesi şirkəti Rafael, Paris Aviasiya Sərgisində stendinin bağlanmasına görə Fransa hökumətini məhkəməyə vermək niyyətindədir. Şirkət bu qərarın ayrı-seçkilik olduğunu bildirərək, ciddi maddi zərərə uğradığını açıqlayıb.
Rafael, Elbit Systems, Israel Aerospace Industries (IAI) və UVision şirkətlərinə məxsus dörd stend bazar ertəsi səhər qara taxta panellərlə örtülüb. Fransa rəsmiləri bildirib ki, bu addım Qəzzada baş verən hərbi əməliyyatları nəzərə alaraq “hücumedici silahların” sərgidə nümayişinə yol verilməməsi qərarına əsasən atılıb.
Crossmedia.az xarici mediaya istinadən bildirir ki, Rafaelin vitse-prezidenti Şlomo Toaff sərgi rəhbərliyinin gecəyarısı xəbərdarlıq etmədən belə bir addım atdığını deyib: “Biz bu stend üçün milyonlarla avro xərc çəkmişik. Bu, açıq ayrı-seçkilikdir. Biz müdafiə sistemlərini nümayiş etdiririk, gül sərgisinə gəlməmişik.” Rafael və digər şirkətlər sərgidəki avadanlıqları çıxarmaqdan imtina etdikləri üçün stendlərin ətrafı sonradan əlavə barrikadalarla bağlanıb.
İsrailin Müdafiə Nazirliyi məsələni “qalmaqallı və görünməmiş” adlandırıb. Elbit şirkətinin vitse-prezidenti Sasson Meshar da bu qərarın ədalətsiz olduğunu vurğulayıb. Fransa Baş naziri Fransua Bayrou isə qeyd edib ki, Qəzzadakı vəziyyət səbəbilə hücum silahlarının sərgidə yer almaması düzgün addımdır.
Qeyd edək ki, bu, İsrail şirkətlərinin Fransadakı müdafiə sərgilərində ilk dəfə üzləşdiyi məhdudiyyət deyil. 2024-cü ildə onlara Eurosatory sərgisində iştirak qadağan olunsa da, daha sonra məhkəmə qərarı ilə Euronaval sərgisində iştiraklarına icazə verilib.
2025-ci il Paris Aviasiya Sərgisi İsraillə Fransa arasında diplomatik gərginliyin artdığı bir dövrə təsadüf edir. Qəzzada HƏMAS-la toqquşmalar nəticəsində on minlərlə insanın həyatını itirməsi beynəlxalq miqyasda ciddi narahatlıq yaradıb.
Zəhra Ağayeva
16:26 18.06.2025
Oxunuş sayı: 9061
