Özbəkistan və İtaliya arasında nüvə enerjisi sahəsində əməkdaşlıq memorandumu imzalanıb
Özbəkistanın “Uzatom” agentliyi ilə İtaliyanın “Ansaldo Energia S.p.A.” şirkəti arasında qarşılıqlı anlaşma memorandumu imzalanıb. Sənəd nüvə energetikası sahəsində bir sıra istiqamətlər üzrə sıx əməkdaşlığın qurulmasını nəzərdə tutur.
Crossmedia.az xarici mediaya istinadən bildirir ki, memorandumun əsas məqsədlərindən biri insan resurslarının inkişaf etdirilməsi və elmi-texniki potensialın artırılmasıdır. Həmçinin sənəddə İtaliyanın qabaqcıl texnologiyalarından və korporativ təcrübəsindən istifadə etməklə sənaye əməkdaşlığının genişləndirilməsi nəzərdə tutulur.
Tərəflər birgə layihələr həyata keçirməklə Özbəkistanda nüvə enerjisi sahəsində bilik və bacarıqları artırmaq niyyətindədirlər. Bu isə ölkədə yeni texnologiyaların tətbiqi, mütəxəssis hazırlığı və elmi-tədqiqat işlərinin gücləndirilməsi baxımından mühüm addım sayılır.
Qeyd edək ki, son dövrlərdə Avropa ölkələrinin Orta Asiyaya, xüsusilə də Türküstan regionuna marağı artıb. Məlumata görə, İtaliya hökumətinin rəhbəri Corca Meloni də Özbəkistana səfər edib. Ekspertlər bu səfəri İtaliyanın bölgədə enerji resursları, o cümlədən uran ehtiyatlarına marağı ilə əlaqələndirirlər.
Bu cür əməkdaşlıqlar həm Özbəkistanın texnoloji inkişafına, həm də Avropa ölkələrinin enerji təhlükəsizliyinə töhfə vermək məqsədi daşıyır. Nüvə enerjisi sahəsində atılan addımlar gələcəkdə daha genişmiqyaslı layihələrin əsasını qoya bilər.
Fatimə Nəbiyeva
14:30 01.06.2025
Oxunuş sayı: 8197
