İlon Mask narkotik iddialarına cavab verdi: “İstehsalımı artırsa, istifadə edərdim”
Texnologiya milyarderi İlon Mask, son dövrlərdə narkotik maddə istifadəsinin artdığına dair iddialara münasibət bildirib.
Crossmedia.az xəbər verir ki, “The New York Times” qəzetinin məlumatına görə, Maskın yüksək dozada maddə qəbul etdiyi və yanında təxminən 20 həb olan bir dərman qutusu daşıdığı iddia olunub. Eyni zamanda onun ketamin, marixuana, LSD və kokain kimi maddələrdən istifadə etdiyi də irəli sürülüb.
Mask bu iddiaları rədd edərək, daim izlənildiyini və narkotik testlərinin heç birində müsbət nəticə çıxmadığını vurğulayıb. Əgər bu maddələr onun məhsuldarlığını artırsaydı, istifadə edəcəyini açıq şəkildə bildirib.
Bununla belə, Mask həkim resepti ilə ara-sıra depressiya üçün ketamin qəbul etdiyini təsdiqləyib. Onun sözlərinə görə, bu maddəni təxminən iki həftədə bir kiçik dozalarda qəbul edir.
Lakin The New York Timesın araşdırmasında, Maskın ketamin və digər narkotik maddələrdən həddindən artıq istifadə etdiyi, ailə münasibətlərində gərginliklər yaşandığı və yaxın çevrəsinin onun ictimai davranışlarından narahat olduğu qeyd olunub.
Xatırladaq ki, Mask 2018-ci ildə Joe Roganın podkastında marixuana istifadə edərkən görüntülənmişdi. Bu hadisədən sonra SpaceX-də çalışanlarla birlikdə bir il ərzində təsadüfi narkotik testlərinə məruz qaldığını açıqlamışdı.
Maskın son açıqlamaları ictimaiyyətdə və iş dünyasında geniş əks-səda doğurub. Bəzi investorlar və iş ortaqları, bu vəziyyətin şirkətlərin imicinə və fəaliyyətinə mənfi təsir göstərə biləcəyindən narahat olduqlarını bildiriblər.
Mədinə Cəlilova
12:54 01.06.2025
Oxunuş sayı: 11006
