Barselona İsraillə bütün əlaqələri kəsdi: Qardaş şəhər razılaşması dayandırıldı
İspaniyanın Barselona şəhər Bələdiyyə Şurası İsraillə bütün institusional əlaqələrin kəsilməsi və Tel-Əviv ilə qardaş şəhər razılaşmasının dayandırılması barədə qərar qəbul edib.
Crossmedia.az İspaniya mətbuatına istinadən xəbər verir ki, Bələdiyyə Şurası Qəzzada baş verənləri “insanlığa zidd” adlandıraraq, İsrail dövləti ilə hərtərəfli münasibətlərin dayandırılmasına səs verib. Qərarda qeyd olunur ki, Tel-Əviv ilə qardaş şəhər razılaşması İsrail beynəlxalq hüquqa hörmət göstərənədək dayandırılır.
Qərar Kataloniya Sosialist Partiyası (PSC), Comuns və Kataloniya Respublikasının Solu (ERC) tərəfindən dəstəklənib, sağ partiyalar isə bitərəf mövqe tutub. Qətnaməyə əsasən, Barselona şəhərinin İsrail yanlısı şirkətlərlə əməkdaşlıqdan imtina etməsi, Barselona Sərgisində İsrail pavilyonlarının açılmasına icazə verilməməsi, İsrailə qarşı silah embarqosu tətbiqi və Barselona limanına İsrail hökuməti üçün silah daşıyan gəmilərin yan almasının qadağan olunması da nəzərdə tutulur.
Bələdiyyə həmçinin, Qəzzada minlərlə insanın həyatını itirməsini, humanitar yardıma qoyulan blokadanı, İordan çayının qərb sahilində yaşayış məntəqələrinin genişləndirilməsini, Fələstin torpaqlarının ilhaqını, əhalinin zorla köçürülməsini və evlərin sistemli şəkildə dağıdılmasını qınayıb.
Barselona Bələdiyyə Başqanının müavini Mariya Eugenia Gay çıxışında Qəzzadakı vəziyyəti “insanlığa zidd, barbarcasına və tamamilə dözülməz” adlandırıb. O bildirib ki, “Qəzzada baş verənlər Qərb dəyərlərinə qarşı açıq yara və açıq çağırışdır. Barselona Bələdiyyəsi bu qərarla qırğınların dayandırılması üçün beynəlxalq təzyiqlərə dəstək verir”.
Qeyd edək ki, 2023-cü ilin fevralında əvvəlki mer Ada Colau dövründə də İsraillə əlaqələrin kəsilməsi barədə qərar qəbul olunmuşdu. Lakin daha sonra vəzifəyə gələn yeni mer Jaume Collboni bu münasibətləri yenidən bərpa etmişdi. Bundan əlavə, Kataloniya muxtar administrasiyası ötən həftələrdə İsrailin Qəzzaya qarşı hərbi əməliyyatlarına etiraz olaraq, Tel-Əvivdəki xarici əlaqələr və ticarət nümayəndəliklərini bağlamaq qərarına gəlib.
Mədinə Cəlilova
11:20 01.06.2025
Oxunuş sayı: 1243
