Pasxa bayramı münasibətilə Lənkəranda mərasim təşkil olunub
Azərbaycanda yaşayan pravoslavların müqəddəs bayramlarından olan Pasxa ölkəmizin cənub bölgəsində də qeyd olunub.
Crossmedia.az xəbər verir ki, bayram tədbiri bölgədə fəaliyyət göstərən yeganə kilsədə - Allahın Əqdəs Validəsinin Dua Örpəyi Kilsəsində keçirilib.
Bu bölgədə yaşayan pravoslav-xristian icmasının nümayəndələri hər il Pasxanı qeyd etmək üçün məhz Lənkərandakı bu kilsəyə toplaşırlar. Pasxa ibadətləri şənbə günündən bazar gününə keçən gecə başlayıb.
Kilsənin keşişi Aleksandr Astaşkin Prezident İlham Əliyevin pravoslav-xristian icmasına ünvanladığı təbrik məktubunu tədbir iştirakçılarının diqqətinə çatdırıb.
Cənub bölgəsində yaşayan pravoslavlar kilsədə dini ayinləri yerinə yetirib, müqəddəs dini nəğmələri dinləyib, şamlar yandırıb, dövlətimizin və xalqımızın əmin-amanlığı üçün dualar ediblər. Keşiş bayram tədbirinə toplaşanlara kuliç və boyanmış yumurtalar təqdim edib.
Kilsənin həyətində paklıq və təmizlik rəmzi olan müqəddəs su bayram şirniyyatlarının üzərinə səpilib. Mərasim boyu pravoslav-xristian icmasının nümayəndələri bir-birlərini təbrik edib, kilsəyə gələnləri bayram şirniyyatlarına qonaq ediblər.
Sakin Natalya Buyanova bildirib: “Bu gün bizim Pasxa bayramımızdır. Biz çox şadıq ki, burada kilsəmiz var və gəlib bir-birimizlə görüşür, qarşılıqlı hədiyyələr veririk”. O, ölkəmizdə müxtəlif dinlərin nümayəndələri üçün yaradılmış şəraitə görə ölkə rəhbərliyinə minnətdarlığını ifadə edib.
15:25 20.04.2025
Oxunuş sayı: 523
