Le Penin prezidentliyə namizədliyinin dayandırılması Fransada siyasi qarışıqlığa səbəb olub
Fransa və ümumilikdə Avropa güclü və təsirli liderliyə ehtiyac duyur.
Crossmedia.az xəbər verir ki, bu barədə "Sky News" yazıb.
Qeyd olunub ki, Fransada Marine Le Penin prezidentliyə namizədliyinin məhkəmə qərarı ilə beş illik dayandırılması ölkədə və beynəlxalq aləmdə ciddi suallar yaradıb. Bu qərar həm onun tərəfdarları, həm də əleyhdarları üçün siyasi mənzərəni qeyri-müəyyənləşdirib.
Qeyd olunub ki, dünyanın aparıcı ölkələrində keçirilən seçkilərin nəticələri qlobal səviyyədə əhəmiyyət daşıyır. G7-yə daxil olan ölkələrdən İtaliya 2022-ci ildə Giorgia Meloni-ni seçərək ifrat sağçıların yüksəlişini təsdiqlədi. Keçən il ABŞ-də Donald Trampın, Birləşmiş Krallıqda isə Kir Starmerin hakimiyyətə gəlməsi siyasətdə ciddi dəyişikliyə səbəb oldu. Bu ilin yazında isə Almaniya daha sərt xətt tərəfdarı olan yeni kansleri seçdi. Fransada isə Emmanuel Makronun səlahiyyət müddəti 2027-ci ilin yayında başa çatır və növbəti prezident seçkilərinə hazırlıq artıq siyasi qarışıqlıq, populizm və hüquqi mübahisələrlə müşayiət olunur.
Bu həftə Fransa məhkəməsi ifrat sağçı “Milli Birlik” partiyasının lideri və prezidentliyə əsas namizəd Marine Le Peni siyasi vəsaitlərin təyinatdan kənar istifadəsinə görə günahkar bilib. Məhkəmə qərarına əsasən, o, beş il ərzində seçkilərdə iştirak edə bilməyəcək və dörd il həbs cəzası alıb. Lakin bu cəza apellyasiya mərhələsindən sonra tətbiq olunacaq və Fransa qanunlarına görə, böyük ehtimalla ev dustaqlığı şəklində olacaq.
Bildirək ki, qərarın ən mübahisəli hissəsi isə Le Penin dərhal siyasətdən uzaqlaşdırılmasıdır. Bu, əvvəlki Fransa prezidentləri Jak Şirak və Nikola Sarkozinin məhkumluqları ilə müqayisədə daha sərt qəbul olunur. Marine Le Pen və RN-in ikinci adamı Jordan Bardella qərarı “siyasi ölüm hökmü” və “nüvə bombası” adlandırıblar. Le Pen öz çıxışında Rusiya müxalifət lideri Aleksey Navalnı və İstanbulun müxalifətçi meri Əkrəm İmamoğluna bənzədildiyini bildirib.
Məhkəməyə rəhbərlik edən hakim Benedikt de Perthuisin əvvəllər biznes sahəsində çalışması, hökumət başçısı Fransua Bayrunun isə qərardan narahat olduğunu bildirməsi qərarın obyektivliyi ilə bağlı suallar yaradıb. Bayrunun rəhbərlik etdiyi partiya oxşar bir işdə məhkum edilsə də, özü bəraət qazanaraq siyasi qadağadan yayınmışdı.
Hazırda RN parlamentdə ən böyük partiyadır (37%), lakin hakimiyyətə gəlməsi koalisiya ilə əngəllənib. Populist liderlər – İtaliyadan Matteo Salvini, Niderlanddan Geert Wilders və Macarıstandan Viktor Orban – Le Pen-ə dəstək veriblər. Donald Tramp da qərarı “Avropa solçularının azad sözə qarşı hüquqi silah kimi istifadə etdiyi oyun kitabı” adlandırıb.
Məlumata görə, Fransadakı bəzi şərhçilər Le Peni əvvəllər korrupsiyaya qarşı sərt çıxışlar etdiyi üçün “ikiüzlülük”də və “Trampizm”də ittiham edirlər. Onun partiyasını daha mülayim imiclə cəmiyyətə təqdim etmək üçün atdığı addımlar – “qalstuk strategiyası” – bu qalmaqalla ciddi zərbə alıb. Hazırkı qərarın siyasi nəticələri isə təkcə Fransa ilə məhdudlaşmır. Hakim dairələr Le Penin işinin yayda sürətləndirilmiş apelyasiyaya çıxarılacağını və bu prosesin 2027 seçkilərinə qədər başa çatacağını bildiriblər. Bu, onun namizədliyinin bərpası üçün ümid qapısı açır. Lakin partiya daxilində gənc lider Jordan Bardella-nın nə dərəcədə dəstək qazanacağı hələ məlum deyil. Bu arada Fransa siyasətində digər iddialı fiqurlar da seçkilərə hazırlaşır. Mərkəz sağdan Edouard Philipp və François Bayrou, sağçı Les Républicains-dən isə daxili işlər naziri Bruno Retailleau mümkün namizədlər arasında sayılır.
Sol cinahda isə Jean-Luc Mélenchon 2027-ci il seçkilərində ikinci tura çıxmaq üçün şansını sınaya bilər.Ümumilikdə, Fransadakı vəziyyət qarışıqdır. Le Penin siyasi karyerasının bu şəkildə zərbə alması isə həm ölkə daxilində, həm də qlobal səviyyədə ifrat sağçı hərəkatların mövqeyini möhkəmləndirə bilər.
Fatimə Məmmədova
21:42 07.04.2025
Oxunuş sayı: 598
