Həmin gecənin ibadəti min ayın ibadətindən üstündür
Ramazan ayı hər bir müsəlman üçün bir ilahi təmizlik və mənəvi yüksəliş dövrüdür. Bu ayda həyatın mənası və məqsədi bir daha düşünülür, insanın iç dünyasına sükunət və aydınlıq gəlir.
Oruc yalnız bədəni ac və susuz saxlamaqdan ibarət deyil. İnsan bu dövrdə nəfsinin istəklərini boğaraq öz daxili aləmində təmizlənir, həsəd və qəzəb kimi pis əxlaq xüsusiyyətlərindən uzaqlaşır. Bu ayda oruc tutmaq insana bir növ nəfsin istəklərinə boyun əyməmək, hər anın mənasını dərk etməyi öyrədir. Ramazan ayı həyatın maddi tərəflərini deyil, mənəvi ölçülərini kəşf etməyə çağırır.
Həzrət Zəhra salamullahu ələyha buyurub:
“Fərəzəllahu-siyam təsbitən lil-ixlas”
“Allah, orucu ixlasın (xalis bəndəyi- qəlbdə iymanı) sabit saxlamaq üçün vacib etdi.”
Müsəlmanlar üçün Ramazan, həm də Allahın əfvini, bağışlamasını və mərhəmətini əldə etmək üçün bir şansdır. Oruc insanı özünə dönməyə, əməllərini yenidən nəzərdən keçirməyə və həyatına Allahın təlimatlarına uyğun yeni bir istiqamət verməyə dəvət edir. Bu, sadəcə bir ibadət deyil, həm də daxili inkişafın, əxlaqi təmizlənmənin və mənəvi zənginləşmənin bir formasıdır.
Crossmedia.az mövzu ilə bağlı məscidin imamı, dini icmanın sədri Hacı Rusif Məmmədova müraciət edib. O ilk olaraq bildirib ki, bu ay fəzilətlərlə doludur: “Mərhəmətli və rəhimli Allahın adı ilə. Mübarək Ramazan ayı fəzilət dolu bir aydır. Bu mübarək ayının gəlişini bizim xalqımız səbirsizliklə gözləyib. Allaha şükürlər olsun ki, Allah bu ayın gəlməsini bizlərə vacib edib. Qurani Kərimin Bəqərə surəsində bəyan edilir: “Ey iman gətirənlər oruc tutmaq sizdən əvvəlki ümmətlərə vacib edildiyi kimi, sizədə vacib edildi ki, bunun vasitəsilə siz təqvalı olasız”.
Müqəddəs kitablardan sayılan hədisi qüdsidə Allah buyurur ki,mübarək Ramazan ayının orucunu tutan bəndənin mükafatını mən verərəm”.
İlahiyyatçının sözlərinə görə, mübarək Ramazan ayının etiramını kim qoruyub saxlasa, Allah həmin insanların günahlarını Ramazan ayında bağışlayar: “Mübarək Ramazan ayı insanları sevgiyə,mərhəmətli olmağa dəvət edir. Peyğəmbərimiz buyurub ki, yaxında və uzaqda olan insanları sevindirin. Həmin insanlar üçün iftar süfrəsi təşkil edin. Allah-Təala oruc tutmağı bu ayda vacib edərək Ramazan ayını müqəddəs aylardan biri etdi”.
“Ramazan mərhəmət, səbr, Allaha yaxınlaşma və günahlardan təmizlənmə,mərhəmət və ibadət ayı olduğu bildirildi. Allah-Təala möminlərə bu ayda daha çox ibadət etməyi,onlara verilən fürsətdən bəhrələnməyi tövsiyə etdi. Mübarək Ramazan ayını digər aylardan iki əsas cəhət fərqləndirir. Bu cəhədlərdən birincisi “Qurani-Kərim”in bu ayda nazil olmasıdır. Digəri isə orucun müsəlmanlara bu ayda vacib buyurulmasıdır. Həmçinin, həmin gecənin ibadəti min ayın ibadətindən üstündür. Əziz və dəyərli xalqımız, çalışaq ki, bu gözəl aydan səmərəli istifadə edək”, - deyə o fikrini yekunlaşdırıb.
Nəzrin Salmanova
18:08 04.03.2025
Oxunuş sayı: 6597
