Bakıda Məhəmməd peyğəmbərin həyatını və irsini özündə əks etdirən kitabın təqdimatı olub
Bakıda Məhəmməd peyğəmbərin (s) həyatını və irsini özündə əks etdirən kitabın təqdimat mərasimi keçirilib.
Crossmedia.az xəbər verir ki, "Əs-Sirə ən Nəbəviyyə" adlı kitabda Allahın rəsulunun həyat və fəaliyyəti, eləcə də irsindən söz açılır.
Əbdülmalik ibn Hişamın “Əs-Sirə ən-Nəbəviyyə” kitabı İslam dünyasının ən önəmli əsərlərindən biri sayılır və ilk dəfədir Azərbaycan dilinə tərcümə olunur.
Təqdimat mərasimində Dini Qurumlarla İş üzrə Dövlət Komitəsinin təmsilçiləri, ictimaiyyət nümayəndələri və media mənsubları iştirak ediblər.
Dini Komitənin Ekspertiza şöbəsinin müdiri Nahid Məmmədov sözügedən kitabın Azərbaycan dilinə tərcümə edilməsinin və nəşrinin əhəmiyyətindən danışıb.
Kitabın həmmüəllifi, filologiya üzrə fəlsəfə doktoru Heybət Heybətov tərcümə prosesindən bəhs edib. O, təqdimatın Ramazan ayında keçirilməsinin təsadüfi olmadığını diqqətə çatdırıb: “Kitabda Məhəmməd (s) peyğəmbərin erkən yaşlarındakı həyatı, onun Mədinəyə hicrəti, yenidən Məkkəyə qayıdışını əhatə edən 500-dən çox hadisə barədə zəngin hadisələr təfsilatı ilə qələmə alınıb”.
Tərcümə əsərinin digər həmmüəllifi Mais Ağaverdiyev isə bildirib ki, əsərdə Allahın rəsulunun yaşadığı dövrdə baş verən tarixi hadisələr barədə dolğun məlumatlar və İslamın yaranma dövrünə dair geniş bilgilər oxucuya təqdim edilir.
Kitab Bakı Dövlət Universitetinin Şərqşünaslıq fakültəsinin ərəb dili kafedrasının müdiri, filologiya elmləri doktoru Vüqar Qaradağlının elmi rəhbərliyi altında çap olunub.
Qeyd edək ki, Məhəmməd (s) peyğəmbərin tərcümeyi-halı ilk dəfə Mühəmməd ibn İshaq əl-Mədəni (699-769) tərəfindən qələmə alınıb. İbn İshaq Allahın rəsulunun yaşadığı dövrə zaman kəsiyində ən yaxın mənbə hesab olunduğundan “Əs-Sirə ən-Nəbəviyyə”nin müəllifi İbn Hişam öz rəvayətində məhz bu əsərə istinad edir.
“Əs-Sirə ən-Nəbəviyyə” müqəddəs kitab və hədislərdən sonra İslam dünyasında Məhəmməd peyğəmbərin (s) həyatını əks etdirən dəqiq mənbə hesab olunur və əhəmiyyət dərəcəsinə görə Qurani-Kərim və hədislərdən sonra İslam elminin üçüncü ən etibarlı qaynağı sayılır.
Sosial layihə çərçivəsində xeyriyyə məqsədilə nəşr edilən kitab Dini Qurumlarla İş üzrə Dövlət Komitəsinin razılığı əsasında “Şərq-Qərb” ASC-də çap olunub.
Təqdim olunan əsər “Ali və Nino”, “Libraff” və “Baku Book Center” şəbəkələri başda olmaqla bir çox kitab mağazalarında satışdadır.
11:22 03.03.2025
Oxunuş sayı: 1273
