DVX rəisi: Qeyri-neft üzrə özəl sektorda əmək müqavilələri 82 faiz artıb
Aktiv vergi ödəyicilərinin sayı 2019-cu illə müqayisədə 1,8 dəfə artaraq ötən il 809 min təşkil edib. ƏDV ödəyicilərinin sayı isə 52,8 min olub ki, burada da 3 dəfəyə yaxın artım var.
Bu barədə Dövlət Vergi Xidmətinin (DVX) rəisi Orxan Nəzərli “Vergi Xidməti – 25: Davamlı inkişaf və effektiv transformasiya” mövzusunda keçirilən Forumda deyib.
O bildirib ki, vergi qanunvericiliyində təsdiq edilmiş vergi təşviqləri hesabına 2019-cu ilin əvvəlindən son tarixədək cəmi əmək müqavilələrinin sayı 471 minədək, o cümlədən qeyri-neft özəl sektorda 443 mindən çox artıb.
“Vergi islahatları nəticəsində qeyri-neft üzrə özəl sektorda əmək müqavilələrinin artımı 82,1 faiz təşkil edir. Bu günə özəl bölmədə əmək müqavilələrinin sayı dövlət sektorunu üstələyir ki, bu da əmək bazarının əhəmiyyətli leqallaşmasını ifadə edir. Həmçinin 2024-cü ildə cəmi əmək haqqı fondu 23,9 milyard manata çatıb ki, burada da 2018-ci illə müqayisə etsək, ümumilikdə 2,5 dəfə, qeyri-neft özəl sektorda isə 2,7 dəfə artım müşahidə olunur”, - deyə Orxan Nəzərli vurğulayıb. (AZƏRTAC)
11:52 13.02.2025
Oxunuş sayı: 3401
