Səməd Seyidov: “Rusiya ilə münasibətlərdə heç bir ciddi problem yoxdur ”
Azərbaycanın AŞPA-dakı nümayəndə heyətinin sədri, Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov son günlər Azərbaycan-Rusiya münasibətləri ətrafında yaranan müzakirələrə münasibət bildirib.
Crossmedia.az xəbər verir ki, o, iki ölkə arasında heç bir ciddi problemin olmadığını və əlaqələrin əvvəlki səviyyədə davam etdiyini vurğulayıb.
“Rusiya böyük ölkədir və orada media vasitəsilə münasibətləri pozmaq istəyən qüvvələr var. Biz də müşahidə edirik ki, bəzi mətbu orqanlar, siyasətçilər, blogerlər və şəxsi maraqları olan şəxslər Azərbaycan-Rusiya münasibətlərini sual altına qoymağa çalışırlar. Lakin həm dövlət, həm də parlamentlərarası səviyyədə əlaqələr mövcuddur və biz lazım olduğu halda bu məsələləri gündəmə gətirə və təhlil edə bilərik.”
Milli Məclisin deputatı, həmçinin Azərbaycan Xarici İşlər Nazirliyinin “Rusiya Evi”nin akreditasiya olunmaması ilə bağlı verdiyi bəyanata toxunaraq, bu məsələnin bəzi dairələr tərəfindən gərginlik yaratmaq məqsədilə istifadə edildiyini bildirib:
“Moskvadan cavab gəldi ki, onlar qanuni məsələlərlə qanun çərçivəsində, yəni akreditasiya ilə məşğul olacaqlar. Amma bu cavab gələnə qədər görün, orada nə qədər insan Azərbaycana qarşı baş qaldırdı, təhdidlər səsləndirdi, qəbulolunmaz ifadələr işlətdi. Biz bilirik ki, Azərbaycanın apardığı siyasət qonşularla ən yüksək səviyyədə əlaqələr qurmaqdır. Ancaq bəzi qüvvələr bu fürsətdən istifadə etməyə çalışır. Ona görə də biz məsələlərə ehtiyatla yanaşmalı və uzun illər formalaşan münasibətlərə milli maraqlar çərçivəsində baxmalıyıq.”
Səməd Seyidov Rusiya miqrasiya siyasətinə də toxunaraq, azərbaycanlı miqrantlara qarşı xüsusi ayrıseçkiliyin olmadığını, bunun ümumi miqrasiya siyasətinin tərkib hissəsi olduğunu qeyd edib:
“Təbii ki, miqrasiya məsələləri ilə bağlı narahatlıq mövcuddur. Lakin miqrantlarla bağlı xüsusi ayrıseçkiliyin olduğunu müşahidə etmirik. Bütün miqrantlara eyni yanaşma tətbiq olunur. Sadəcə, Rusiyada elə qüvvələr var ki, onlar Azərbaycan-Rusiya münasibətlərinin gərginləşməsində maraqlıdır. Hesab edirəm ki, Rusiya rəhbərliyi də onlardan agahdır.”
Qeyd edək ki, son günlər bəzi Rusiya mediasında Azərbaycan-Rusiya münasibətləri ilə bağlı müxtəlif iddialar səsləndirilir. Azərbaycan isə münasibətlərin uzunmüddətli əməkdaşlıq və milli maraqlar çərçivəsində davam etdiyini bildirir.
08:05 08.02.2025
Oxunuş sayı: 6630
