Təyyarədə dava düşdü: Pilot marşrutu yarımçıq dayandırdı
İspaniyanın Tenerife adasından Böyük Britaniyanın Liverpul şəhərinə uçan sərnişin təyyarəsi göyərtədə baş verən dava səbəbindən geri qayıtmağa məcbur olub.
Crossmedia.az xəbər verir ki, "TRT Haber" bu barədə məlumat yayıb.
Məlumata görə, çərşənbə axşamı axşam saatlarında baş verən insident zamanı təxminən 10 sərnişin arasında dava düşüb. Hava hərəkətinə nəzarət xidməti bildirib ki, kapitan pilot uçuş təhlükəsizliyini təhdid edən insidentə görə Tenerife Cənub Hava Limanına geri dönmək qərarı verib.
186 sərnişin tutumuna malik təyyarə ekipajın müraciəti əsasında hava limanına eniş edib. Davada iştirak edən sərnişinlər polis tərəfindən təyyarədən çıxarıldıqdan sonra reys Liverpul istiqamətində uçuşunu davam etdirib.
"easyJet" aviaşirkəti hadisə ilə bağlı açıqlamasında bildirib ki, qaydaları pozan sərnişin qrupu səbəbindən təyyarə geri qaytarılıb və hava limanında polis əməkdaşları tərəfindən qarşılanıb.
Şirkət qeyd edib ki, ekipaj bu cür hallara operativ müdaxilə etmək üçün xüsusi hazırlıq keçib və sərnişinlərin, eləcə də heyətin təhlükəsizliyi hər zaman əsas prioritetdir.
Bundan başqa, Böyük Britaniyanın Nəqliyyat Nazirliyi və Daxili İşlər Nazirliyinin təyyarədə qayda pozan sərnişinlərin bütün aviaşirkətlər tərəfindən uçuşlardan kənarlaşdırılmasını nəzərdə tutan yeni mexanizm üzərində işlədiyi bildirilib. Layihəyə əsasən, aviaşirkətlər qayda pozan sərnişinlər barədə məlumatları vahid sistem vasitəsilə paylaşacaqlar.
13:43 23.07.2026
Oxunuş sayı: 38
