Qalibaf: İran iqtisadi inkişaf mərhələsinə keçməlidir
İran Parlamentinin sədri və İslam Respublikasının ABŞ ilə danışıqlar qrupunun rəhbəri Məhəmməd Bager Qalibaf ölkəsinin qarşıdurma mərhələsindən çıxaraq iqtisadi inkişaf və ölkə quruculuğuna diqqət yetirməsinin vacibliyini vurğulayıb.
Crossmedia.az xarici mənbələrə istinadən xəbər verir ki, Qalibaf Çinlə iqtisadi əlaqələrin əhəmiyyətindən danışarkən bildirib ki, İran artıq yeni mərhələyə keçməli və resurslarını daha çox iqtisadi tərəqqiyə yönəltməlidir.
“Biz səngəri müharibə veteranlarından təhvil almalı və ölkə quruculuğuna yönəlməliyik”, – deyə o qeyd edib.
Qalibaf Çini İranın ticarət sahəsində “bənzərsiz tərəfdaşı” adlandıraraq vurğulayıb ki, Pekin Tehranın Çin üçün hər mənada etibarlı və tamhüquqlu tərəfdaş olduğuna inanmalıdır.
Parlament sədri həmçinin bildirib ki, Fars körfəzi ölkələrinin iştirakı ilə yaradılacaq istənilən regional iqtisadi və siyasi blokun əsas dayaqları Çin və İran olacaq.
Qalibafın bu açıqlamaları İran və ABŞ arasında Anlaşma Memorandumunun imzalanmasından sonra səslənib. Həmin sənədin ölkə iqtisadiyyatına mümkün təsirləri İran daxilində geniş müzakirə olunmağa davam edir.
10:50 18.06.2026
Oxunuş sayı: 63
