Qambiya sahillərində miqrant faciəsi: ölən və itkin düşənlər var
Qambiya sahillərində təxminən 200 miqrantı daşıyan qayığın aşması nəticəsində ən azı 7 nəfər həyatını itirib, onlarla insan isə dənizdə itkin düşüb.
Crossmedia.az xəbər verir ki, bu barədə TRT Haber məlumat yayıb.
Belə ki, hadisə Şimal Sahili Bölgəsində, Jinack kəndi yaxınlığında baş verib.
Qambiya Müdafiə Nazirliyinin məlumatına görə, qayıq Kanar adalarına doğru hərəkət edirmiş. İndiyədək 96 nəfər xilas edilib, 10 nəfərin vəziyyətinin ağır olduğu bildirilir. Axtarış-xilasetmə əməliyyatları davam edir.
Rəsmilər həlak olanların bir qisminin Qambiya vətəndaşı olmadığını açıqlayıb. Hadisədən sonra Hərbi Dəniz Qüvvələri və balıqçı qayıqları əraziyə cəlb olunub.
Atlantik okeanı üzərindən Kanar adalarına gedən marşrut miqrantlar üçün ən təhlükəli yollardan biri hesab olunur. 2024-cü ildə bu marşrutla Avropaya çatmağa çalışan 9 mindən çox miqrant həyatını itirib.
Fatimə Məmmədova
21:58 02.01.2026
Oxunuş sayı: 1188
