Gündəm

Azərbaycan və Qambiya arasında əməkdaşlığın perspektivləri müzakirə edilib

Azərbaycan Beynəlxalq İnkişafa Yardım Agentliyi Qambiya Universitetinə mümkün dəstək göstərə bilər və Qambiya tərəfinin bu xüsusda təklifləri nəzərdən keçirilə bilər.

Crossmedia.az xəbər verir ki, bu məsələ Azərbaycanın Mərakeşdə və Qambiyadakı səfiri Nazim Səmədovun Qambiyaya səfəri zamanı həmin universitetdə keçirdiyi görüşdə müzakirə olunub.

Görüşlərdə Qambiyada Azərbaycanla bağlı məlumatlılıq səviyyəsinin artırılması, iki ölkənin media nümayəndələri arasında təmasların genişləndirilməsi və qambiyalı jurnalistlərin Azərbaycana tanışlıq səfərlərinin təşkilinin zəruriliyi vurğulanıb. Eyni zamanda, ölkələrimiz arasında siyasi, iqtisadi, humanitar sahələrdə əlaqələrin mövcud durumu və perspektivlərinə dair geniş fikir mübadiləsi aparılıb, əməkdaşlığın dərinləşdirilməsi və gələcəkdə birgə layihələrin reallaşdırılması məsələləri müzakirə edilib.

Bundan başqa, görüşlərdə parlamentlərarası münasibətlərə toxunulub, iki ölkənin ali qanunvericilik orqanlarında dostluq qruplarının yaradılmasının parlamentlərarası əməkdaşlığın möhkəmləndirilməsinə töhfə verə biləcəyi qeyd olunub.

Səfər zamanı Qambiya Milli Assambleyasının sədri Fabakari Tombonq Jatta, sədrin müavini Siidi Njie, Qambiya Xarici İşlər, Beynəlxalq Əməkdaşlıq və Xaricdə yaşayan Qambiyalılar Nazirliyinin Daimi Katibi, səfir Labu Yanq, Gənclər və İdman naziri Bakari Badjie, paytaxt Banjul şəhərinin meri Rohey Malik Loue və digər rəsmi şəxslərlə görüşlər keçirilib.