Davud Rüstəmov: 2025-ci ildə APT tipli hücumlar üstünlük təşkil edib
2025-ci ildə Azərbaycanda kibertəhdidlər arasında dövlət dəstəkli (state sponsored) mənşəli APT (Advanced Persistent Threat) tipli hücumların artımı müşahidə olunub, ransomware hücumlarının sayı isə azalıb.
Crossmedia.az xəbər verir ki, bu barədə Dövlət Təhlükəsizliyi Xidmətinin Milli Kibertəhlükəsizlik Mərkəzinin rəisi Davud Rüstəmov AKTA-nın illik hesabat tədbirində məlumat verib.
Onun sözlərinə görə, cari il ərzində kritik informasiya infrastrukturlarının birinə qarşı kibercinayət halı qeydə alınıb və qarşısı alınaraq operativ araşdırmalar nəticəsində iki nəfər məsuliyyətə cəlb olunub. Müdaxilənin vaxtında aşkarlanması məlumat sızmasının başqa kritik infrastrukturlara qarşı törədilməsinə və daha geniş təsirlərin qarşısını almağa imkan verib.
D.Rüstəmov qeyd edib ki, APT hücumları əsasən dövlət dəstəyi ilə həyata keçirilən mürəkkəb və uzunmüddətli hücumlar olmaqla daha ciddi təhlükə yaradır. Bu hücumlara qarşı mübarizə çərçivəsində aidiyyəti dövlət qurumları ilə birgə araşdırma, qarşısının alınması və preventiv tədbirlər həyata keçirilir.
Milli Kibertəhlükəsizlik Mərkəzinin rəisi əlavə edib ki, 2025-ci ildə kibertəhdidlərə qarşı mübarizə platforması genişləndirilib. MİSP (Malware Information Sharing Platform) platforması üzərindən həyata keçirilən məlumat mübadiləsinə artıq 5 xarici dövlətin milli kibertəhlükəsizlik mərkəzləri qoşulub və əldə edilən təhdid indikatorları maraqlı tərəflərlə operativ şəkildə paylaşılır.
Davud Rüstəmov vurğulayıb ki, beynəlxalq əməkdaşlığın genişlənməsi ölkənin kiberdayanıqlılığının artırılmasına mühüm töhfə verir.
23:18 18.12.2025
Oxunuş sayı: 1174
