Azərbaycan Prezidentinin Misir sammitinə dəvəti dövlətimizin nüfuzunu gücləndirir - Komitə sədri
Azərbaycanın dünyada etibarlı tərəfdaş kimi tanınması və qlobal məsələlərin həllində fəal iştirak etməsi ölkəmizin beynəlxalq nüfuzunun artdığını göstərir. Son günlər Misirdə keçirilən və məhdud sayda dövlətin qatıldığı sammitə Prezident İlham Əliyevin dəvət olunması bu statusun bariz nümunəsidir. Bu addım həm dövlətimizin, həm də Prezidentimizin regional və beynəlxalq səviyyədə strateji mövqeyini daha da möhkəmləndirir.
Milli Məclisin İctimai birliklər və dini qurumlar komitəsinin sədri Fazil Mustafa mövzuyla bağlı Crossmedia.az-a açıqlamasında bildirib ki, bu həm Azərbaycan dövlətinin, həm də Prezident İlham Əliyevin nüfuzunun təzahürüdür: "Sabit dövlət kimi bütün proseslərdə əhəmiyyətli rolu olduğuna görə, Azərbaycan burada yüksək səviyyədə təmsil olunur. Prezidentimiz bu imkanları effektiv şəkildə dəyərləndirir. Bu həm ikitərəfli əməkdaşlığa, həm də çoxsaylı ölkələrlə münasibətlərin inkişafına töhfə verir".
Deputat əlavə edib ki, Azərbaycanın xüsusi seçilməsi və Amerika tərəfinin ölkəyə mühim tərəfdaş kimi yanaşması strateji baxımdan önəmlidir: "Bu istiqamətdə aparılan çalışmalar dövlətimizin nüfuzu və imici üçün müsbət nəticələr verəcək".
Nigar Yahyazadə
18:06 14.10.2025
Oxunuş sayı: 4162
