Zəngəzur dəhlizi böyük geosiyasi və geoiqtisadi dəyişikliklərə səbəb olacaq - Deputat
Zəngəzur dəhlizinin açılması ilə bağlı son günlər regional və beynəlxalq gündəmdə geniş müzakirələr aparılır. Layihə Azərbaycanın Naxçıvanla quru əlaqəsini gücləndirməklə yanaşı, bütün region üçün yeni əməkdaşlıq və tərəqqi imkanları yaradır.
Bu barədə Milli Məclisin deputatı Tural Gəncəliyev Crossmedia.az-a açıqlamasında bildirib ki, Zəngəzur dəhlizi yalnız Azərbaycanın Naxçıvanla quru əlaqəsini təmin etməklə kifayətlənmir, həm də türk dünyasının birləşməsinə və regional transport-kommunikasiya xətlərinin tam gücü ilə işləməsinə şərait yaradır. "Bu dəhliz böyük geosiyasi və geoiqtisadi dəyişikliklərə səbəb olacaq. İngilislər demiş "game changer" – yəni oyunun qaydalarını dəyişən layihədir", – deyə o qeyd edib.
O vurğulayıb ki, Ermənistanın bu dəhlizin açılmasına qarşı 30 illik fəaliyyəti yalnız özünə ziyan vurub, çünki dəhliz bütün regional ölkələr üçün faydalıdır: "Zəngəzur dəhlizi, həmçinin, uzaq Çindən Avropaya uzanan Orta dəhlizin bir komponenti olaraq qitələri birləşdirən strateji layihədir".
Deputat onu da bildirib ki, hazırda Rusiya-Ukrayna münaqişəsi səbəbindən Şimal dəhlizi fəaliyyət göstərmir. "Münaqişə başlamazdan əvvəl Avropa-Asiya arasında ticarət dövriyyəsinin 86%-i Rusiya üzərindən həyata keçirilirdi. İndi isə Zəngəzur dəhlizinin açılması dünya iqtisadiyyatına da xeyir gətirir. Bu baxımdan, layihənin həyata keçirilməsi bütün böyük güc mərkəzləri üçün strateji əhəmiyyət daşıyır", – deyə o qeyd edib.
Nigar Yahyazadə
17:58 14.10.2025
Oxunuş sayı: 5496
