Azərbaycan–Rusiya münasibətlərində yeni mərhələ: strateji əməkdaşlıq dərinləşir - Deputat
Cənab Prezident İlham Əliyev və Rusiya Federasiyasının Prezidenti Vladimir Putin arasında Düşənbədə keçirilən görüş iki ölkə münasibətlərinin tarixi inkişaf xəttində növbəti uğurlu səhifə kimi yadda qaldı. Görüş zamanı müzakirə olunan məsələlər və əldə olunan razılaşmalar göstərdi ki, Bakı ilə Moskva arasında siyasi dialoq qarşılıqlı etimad, praqmatik əməkdaşlıq və regional sabitliyə xidmət prinsipləri üzərində formalaşıb. Bu görüş həm ikitərəfli münasibətlərin gələcək istiqamətlərini müəyyənləşdirdi, həm də regionda formalaşan yeni geosiyasi reallıqlar fonunda Azərbaycan–Rusiya əməkdaşlığının strateji mahiyyətini bir daha ortaya qoydu.
Mövzu ilə bağlı Milli Məclisin deputatı Məzahir Əfəndiyev Crossmedia.az-a açıqlama verib:
“Azərbaycan Respublikası ilə Rusiya Federasiyası arasında 2022-ci ildə imzalanmış "Müttəfiqlik qarşılıqlı fəaliyyəti haqqında Bəyannamə" bu günə qədər Azərbaycan–Rusiya münasibətlərinin dayanıqlı və sistemli şəkildə inkişafına mühüm töhfə vermişdir. Şübhəsiz ki, ötən ilin dekabr aynda baş vermiş təyyarə qəzası Azərbaycan ictimaiyyəti və dövlət rəhbərliyi tərəfindən dərin təəssüf hissi ilə qarşılanmışdır. Azərbaycan tərəfi bu hadisənin hərtərəfli araşdırılmasını və Rusiya Federasiyasının ali rəhbərliyinin məsələ ilə bağlı münasibətini açıqlamasını gözləyirdi. 09 oktyabr 2025-ci il tarixində Tacikistanın paytaxtı Düşənbə şəhərində Azərbaycan Respublikasının Prezidenti cənab İlham Əliyev ilə Rusiya Federasiyasının Prezidenti cənab Vladimir Putin arasında keçirilmiş görüş bir daha sübut etdi ki, Azərbaycan–Rusiya münasibətləri sarsılmaz təməl üzərində qurulmuşdur və qarşılıqlı hörmətə, etimada əsaslanır. Əminliklə demək olar ki, bu münasibətlər gələcəkdə də eyni konstruktiv və strateji xətt üzrə inkişaf etməyə davam edəcəkdir”.
Ayhan
22:24 13.10.2025
Oxunuş sayı: 5609
