"Bakı Kitab Mərkəzi"ndən reportaj: Kimi zəngin, kimi xoşbəxt olmaq üçün kitab axtarır

Hər kəsin  səs-küydən uzaqlaşıb sakit bir guşədə sığınacaq axtardığı anlar olur. Elə biz də bu axtarışla "Bakı Kitab Mərkəzi"nə (" Baku Book Center")-ə yollandıq. Bura 2018- ci ildən fəaliyyət göstərir. Heydər Əliyev Fondunun təşəbbüsü və dəstəyi ilə yaradılmış Mərkəz kitab satışına yeni bir yanaşma gətirərək, Azərbaycan, rus, türk, ingilis, fransız, alman, ərəb və digər dillərdə müxtəlif janrlarda kitablar təqdim edir.

Sahəsi 2500 kvadratmetr olan Mərkəzin 1-ci və 2-ci mərtəbələrində Heydər Əliyev Fondunun nəşrləri nümayiş olunur. Birinci mərtəbədə həmçinin, "I Love Baku" brendinin, “Azərpoçt” MMC-nin məhsulları, Azərbaycan dilində və xarici dillərdə dünya bestsellerləri, klassik ədəbiyyat, qeyri-bədii əsərlər, incəsənət albomları, turist bələdçiləri, dəftərxana malları və hədiyyələr mövcuddur. Kitab satışına əlavə olaraq, birinci mərtəbədə "Coffee mood" adlı kafe fəaliyyət göstərir.

İçəri daxil olanda ilk diqqətimizi çəkən məqam sakitlik oldu – hər kəs öz aləmində, bir kitabın səhifələrində itib-batmışdı. 

Bizi qurumun Mətbuat və ictimaiyyətlə əlaqələr üzrə meneceri Nigar Hüseynova qarşılayır. Onun sözlərinə görə, Mərkəzin ikinci mərtəbəsində oxu zalı, zəif görmə qabiliyyəti olan insanlar üçün xüsusi bölmə, uşaqlar üçün guşə, müxtəlif tədbirlərin keçirilməsi və elmi fəaliyyətlərlə məşğul olanlar üçün nəzərdə tutulmuş sahələr mövcuddur.

"Baku Book Center"-də kitabsevərlərin asudə vaxtlarını keçirmələri üçün əlavə imkanlar da var. Burada mütəmadi olaraq müxtəlif kitab təqdimatları, məşhur yazıçılar, şairlər və sevilən mədəniyyət və incəsənət xadimləri ilə görüşlər, ustad dərsləri, uşaqlarda mütaliəyə marağı artırmaq məqsədilə tanınmış şəxslərin iştirak etdiyi Oxu saatları və beynəlxalq təşkilatlar, eləcə də xarici səfirliklərlə birgə təşkil olunan tədbirlər keçirilir.

Biz də hamı kimi  çantalarımızı xüsusi ayrılmış guşəyə  qoyuruq. İçəri daxil olub,  "Baku Book Center"in xüsusi guşəsi olan kafeyə keçib çay içirik. Ətrafda insanların çoxluğuna baxmayaraq, sakitlik hökm sürürdü. Çünki hər kəs bura kitabla baş-başa qalmaq üçün gəlmişdi.

Layihə meneceri Leyla Əsgərova ilə hömsəhbət oluruq. Altı ildir burada çalışan Leyla xanımın sözlərinə görə, burada müntəzəm olaraq müxtəlif tədbirlər, o cümlədən görüşlər, şair və yazıçılarla imza günləri keçirilir: "Hətta xarici müəlliflər də burada olurlar. Bizim onlarla sıx əməkdaşlığımız var. Kitab satış mərkəzinin əsas özəlliyi budur ki, insanlar burada özlərini evlərindəki kimi hiss edirlər. Buraya gələnlər arasında hətta səfirlik nümayəndələri də var". 

Həmsöhbətimizlə danışa- danışa ətrafda gəzirik. Leyla xanım bizi zallarla tanış edir. Onun sözlərinə görə, yeddi ildir ki, "Baku Book center" də "Yüksəl" layihəsi keçirilir: "Oxucularla oxuduqları kitabların məzmunu barədə danışırlar. Əsas məqsədimiz kitabı, ədəbiyyatı təbliğ etməkdir. Bu layihə maraqla qarşılanır". 

Leyla xanım "Kitab Mərkəzinin qonaqları ilə səmimi salamlaşır. Axırda dayana bilməyib, soruşuruq: "Bütün müştəriləri tanıyırsınız?". 

Təbəssümlə cavab verir:

- Əlbəttə, hamısını yox. Amma daimi müştərilərimiz var. Onları üzdən tanıyırıq. Hətta ədəbi zövqlərinə də bələdik...

Bir az fasilə verdikdən sonra əlavə edir:

- Bilirsiniz, işimiz asan deyil. Amma maraqlıdır. Əsas odur ki, təxminən 35 nəfərlik kollektiv, o cümlədən on satıcının hər biri öz işini sevir. Bu, müştərilərdə də maraq oyadır. Eyni zamanda müntəzəm olaraq keçirdiyimiz tədbirlər, kitabların münasib qiymətləri də oxucuların diqqətini çəkir. 

Ətrafdakı cütlüklər, valideynləri ilə kitab rəflərinə maraqla baxan kiçikyaşlılar diqqətimiz çəkir. Təxminən 3-4 yaşlarında bir uşaq balaca əlləri ilə rəngli kitabı rəfdən çıxarmaq istəyir, lakin, deyəsən, boyu çəkmir. Onun kitabla "mübarizəsi" təkcə bizim yox, ətrafdakı çoxunun diqqətini çəkir. 

Birlikdə ikinci mərtəbəyə qalxırıq. Leyla xanım bizi satıcılarla tanış edir. Xəzər Əsgərovla söhbət zamanı belə məlum olur ki, detektiv ədəbiyyata maraq daha çoxdur. Konkret hansı müəlliflərin daha çox oxunduğunu soruşanda Elxan Elatlının, Rövşən Abdualloğlunun  adını eşidirik. Əslində bu, bizi o qədər də təəccübləndirmir. Çünki həm Elxan Elatlının, həm də Rövşən Abdullaoğlunun ölkədə çox sevilən müəlliflərdən olduqlarını bilirik. 

Deyirlər, düz insan sözünün üstünə çıxar. Leyla xanım buraya xaricilərin də gəldiyindən yenicə söz açmışdı ki, qarşımıza simasından Asiya ölkələrinin birindən olduğu duyulan gənc çıxır. O da oxuyur. Əlindəki isə Azərbaycan dilində kitabdır. Bu, bizi təəccübləndirdiyi qədər də sevindirir, fərəhlənirik. 

Sonra uşaqlar üçün ayrılmış guşəyə gedirik. Burada da uşaqlar öz valideynləri ilə birgə vaxt keçirirlər. Uşaqların xüsusi əyləncə məkanı var . Qarşısında isə gənc satıcı uşaqlarla maraqlanır, onlarla oynayırdı.

Leyla xanımın sözlərinə görə, 2019-2020-ci illərdə bütün dünyada geniş yayılan COVİD-19 pandemiyasına qədər burada uşaqlar üçün ayrıca əyləncə havası vardı: "Artıq uşaqlar da böyüdü, zaman da keçdi".

Başqa bir satıcı Roman Nurullayev isə bildirir ki, rus klassikasına maraq daha böyükdür. O, Puşkinin, Lermontovun, Çexovun ən çox oxunan müəlliflərdən olduğunu söyləyir. 

Roman bəylə söhbətimizə yenicə başlamışdıq ki, bir müştəri yaxınlaşır və Mark Levinin "Üfüqün əks tərəfi" kitabını soruşur. Satıcı cəmi bir neçə saniyəyə sözügedən kitabı tapır və alıcıya verir. 

Satış meneceri  Cəmilə Əsgərovanın sözlərinə görə, bu, adi haldır: "Bilirsiniz, bəzən müştərinin çox vaxtı olmur. Biz bunu başa düşürük. Odur ki, əməkdaşlarımız hansı kitabın harada olduğunu dəqiq bilirlər. Bu, işin asan tərəfidir. Bəzən elə olur ki, alıcı arzuladığı kitabı sadəcə təsvir edir, amma ad çəkmir. Belə olan halda satıcılarımız müvafiq kitab tövsiyəsi verirlər. Məsələn,  bizə deyirlər ki, məni depressiyadan çıxaracaq kitab tövsiyə edin. Yaxud da kimsə xoşbəxt olmağın, bir başqası zəngin olmağın yollarını öyrənə biləcək kitablar istəyir. Belə hallarda onlara mümkün qədər kömək oluruq". 

Gördüyüm bir mənzərə hər birimizin diqqətini çəkir: Bir ata uşağının əlindən tutaraq ona kitabları göstərir. Beləliklə, ata öz övladını hələ kiçik yaşlarından ədəbiyyata meyilləndirir. Bir - birimizə baxıb, təbəssüm edirik. 

"Book center"dən çıxana yaxın bir satıcı ilə müştərinin dialoquna "qulaq misafiri" oluruq.

Gənc satıcı xanım Ernest Hemenqueyin "Qoca və dəniz" kitabını alıcıya uzadaraq deyir: 

"Bu kitabı oxuyun. Əminəm ki, peşman olmayacaqsınız”. 

Alıcı isə cavabında sadəcə gülümsəyir və “kitabı oxuyandan sonra təəssüratlarımı sizinlə bölüşəcəyəm” deyir.

Fatimə Məmmədova

Xumar Emilqızı