Tailand məktəbində atışma: Ölənlər var
Tailandın Nonthaburi əyalətində yerləşən Tepsirin məktəbində baş verən silahlı insident nəticəsində hücumçu da daxil olmaqla 7 nəfər ölüb, 15 nəfər yaralanıb.
Crossmedia.az xəbər verir ki, "Khaosod" bu barədə məlumat yayıb.
Məlumata görə, hadisə avqustun 7-də səhər Banqkruay rayonundakı Tepsirin məktəbində baş verib. Ölənlərdən üçü müəllim, üçü şagird, biri isə atəşi açan şagirddir.
Bildirilib ki, hücumçu məktəb binalarından birində ölü tapılıb. İlkin ehtimala əsasən, o, intihar edib.
Polisin məlumatına görə, hadisə nəticəsində daha 15 nəfər xəsarət alıb. Yaralılardan ikisinin vəziyyəti ağır qiymətləndirilir.
Atışma barədə məlumat daxil olduqdan sonra hadisə yerinə polis əməkdaşları, xilasedicilər və təcili tibbi yardım briqadaları cəlb edilib. Məktəbin ərazisi mühasirəyə alınıb, şagirdlər, müəllimlər və digər əməkdaşlar təhlükəsiz əraziyə təxliyə olunub.
Hüquq-mühafizə orqanları hadisənin başvermə səbəblərini araşdırır.
09:21 07.08.2026
Oxunuş sayı: 57
