Jurnalistin ölümə dönən cəsarəti: Salatın Əsgərovanın anım günü
Jurnalist qorxmamalıdır, jurnalist cəsarətli olmalıdır. Bəzi jurnalistlər var ki, canını belə fəda edər. Jurnalist adını qoruyar, sözün gücü ilə işıq saçar və heç bir təhlükədən çəkinməz. Azərbaycan jurnalistikası belə qəhrəman simaların sayəsində böyüyüb və güclənib.
Onlardan biri də Salatın Əsgərova idi. O, sözün gücünü silahdan üstün tutmuş, peşəsinə sədaqətini həyatının son anına qədər qorumuş bir jurnalist idi.
Salatın Əziz qızı Əsgərova 1961-ci il dekabrın 16-da Bakı şəhərində ziyalı bir ailədə dünyaya gəldi. Kiçik yaşlarından o, öyrənməyə, oxumağa və haqqı çatdırmağa böyük maraq göstərirdi. 1979-cu ildə Bakı şəhəri M.Müşfiq adına 18 saylı orta məktəbi əla qiymətlərlə bitirdi və eyni ildə Azərbaycan Neft və Kimya İnstitutuna daxil oldu. 1984-cü ildə geofizika ixtisası üzrə mühəndis diplomu aldı. Amma onun qəlbi jurnalistikaya çəkilmişdi. Mühəndislik onun üçün yalnız bilik və bacarıqların təməli, həyat missiyası isə həqiqəti, insan hekayələrini və savaşın səsini çatdırmaq idi.
1988-1989-cu illərdə Qarabağda baş verən hadisələr onun həyatını tamamilə dəyişdirdi. Azərbaycan xalqının başına gətirilən faciələr Salatını sözün gücü ilə hər şeyi dəyişdirə biləcəyinə inandırdı. O, universiteti bitirsə də, jurnalist kimi fəaliyyətə başladı. 1984-cü ildə “Bakı” qəzetində, daha sonra “Molodyoj Azerbaydjana” qəzetində işə başladı. Salatın müharibənin ilk günlərindən cəbhənin qaynar nöqtələrində olub, hərb mövzularında yazılar yazırdı.
Onun reportajları döyüş bölgələrinin canlı səhnələrini əks etdirir, oxuculara həm torpağın, həm də insanların dərdini çatdırırdı.
Salatın yalnız jurnalist deyildi, o həm də bir ana idi. O, oğlunun gələcəyi üçün, əmin-amanlıq içində yaşaması üçün risklərə sinə gərdi. Amma 1991-ci il yanvarın 9-da Laçından Şuşaya gedərkən, yolun 6-cı kilometrliyindəki Qaladərəsi kəndi yaxınlığında onun olduğu maşın yaxın məsafədən güclü atəşə tutuldu. Salatın Əsgərova həmin hadisədə qəhrəmancasına həlak oldu. Onun ölümü yalnız bir şəxsin yox, Azərbaycan jurnalistikasının, insanlığa sədaqətin və sözün gücünün böyük itkisi oldu.
Salatın Əsgərovanın adı ölümsüzdür. Ölümündən sonra Beynəlxalq Jurnalistlər İttifaqı Konfederasiyası ona laureat adını verdi. Həlak olduğu kənd Salatınkənd adlandırıldı. Bakı şəhərində yaşadığı binada xatirə lövhəsi vuruldu, Bakıda küçələrdən biri və Bakı buxtasında gəzinti kateri onun adını daşıyır. Təfəkkür Universitetində onun büstü qoyulub. 1992-ci il 6 noyabrda Azərbaycan Respublikası Prezidentinin fərmanı ilə Salatın Əsgərova ölümündən sonra “Azərbaycanın Milli Qəhrəmanı” adına layiq görüldü. O, Bakı şəhərində Şəhidlər Xiyabanında dəfn edilib.
Salatın Əsgərova bizə göstərdi ki, jurnalist yalnız xəbərləri çatdıran deyil, həm də qorxmaz, cəsarətli və haqqın yanında dayanan bir qəhrəmandır. Onun həyatı və ölümü jurnalistlər üçün örnək, Azərbaycan xalqı üçün isə unudulmaz bir qəhrəmanlıq nümunəsidir. Onun adı həmişə sözün və əsl fədakarlığın simvolu olaraq xatırlanacaq.
Fatimə Məmmədova
09:10 09.01.2026
Oxunuş sayı: 1986
