QMİ sədri BMT Sivilizasiyalar Alyansının ali nümayəndəsi ilə görüşüb
Qazaxıstan Respublikasında səfərdə olan Qafqaz Müsəlmanları İdarəsinin sədri şeyxülislam Allahşükür Paşazadə Dünya və Ənənəvi Dinlərin liderlərinin VIII Astana Qurultayında iştirakı çərçivəsində sentyabrın 18-də BMT Sivilizasiyalar Alyansının (SA) ali nümayəndəsi Migel Anhel Moratinos ilə görüşüb.
QMİ-nin mətbuat xidmətindən bildirilib ki, görüşdə BMT Sivilizasiyalar Alyansı ilə Azərbaycan dövləti və dini mərkəz olaraq Qafqaz Müsəlmanları İdarəsi arasında əməkdaşlığın yüksək səviyyəsindən məmnunluq ifadə olunub. Bildirilib ki, BMT SA Azərbaycanın ev sahibliyi etdiyi tədbirlərdə yaxından iştirak edir, ölkəmizin dinlər, sivilizasiyalararası dialoq və əməkdaşlıq müstəvisində irəli sürdüyü təşəbbüslərə dəstək verir. Azərbaycan dövləti və Qafqaz Müsəlmanları İdarəsi də BMT SA-nın qlobal forumlarına uğurla ev sahibliyi edir və onun tədbirlərində hər zaman yüksək səviyyədə təmsil olunur.
QMİ sədrinin BMT SA-nın Kaşkayşda X Qlobal Forumunda və Hernikada anım tədbirində fəal iştirakına görə ona dərin minnətdarlığını bildirən M.A.Moratinos rəhbərlik etdiyi qurum xətti ilə nəzərdə tutulan qarşıdakı tədbirlərdə də A.Paşazadənin fəal iştirakına ümidvar olduğunu qeyd edib.
Azərbaycanın dinlərarası forumlara yüksək səviyyədə ev sahibliyi etdiyini vurğulayan BMT rəsmisi İslamofobiyaya qarşı mübarizə üzrə səlahiyyətli olduğunu xatırladıb. O, Azərbaycanın bu müstəvidə fəal olduğunu bildirib və qarşıda birgə konfransların təşkilinə dair fikirlərini bölüşüb.
M.A.Moratinos Azərbaycanın multikulturalizm modeli, dinlərarası tolerantlıq və məzhəblərarası anlaşma modellərinin dünya ictimaiyyəti üçün əhəmiyyət kəsb etdiyini, bunların davamlı təşviqinin vacibliyini xüsusi vurğulayıb.
Azərbaycanın bölgədə sülh istiqamətində nail olduğu uğurları yüksək qiymətləndirən M.A.Moratinos fürsətdən istifadə edərək şeyxülislam A.Paşazadəni bu yaxınlarda nüfuzlu "Dinlər Sülh Uğrunda" Beynəlxalq Təşkilatının həmprezidenti seçilməsi münasibətilə təbrik edib, onun bəşəri əhəmiyyətli səy və əməllərinə uğurlar arzulayıb.
Görüşdə Bakı Beynəlxalq Multikulturalizm Mərkəzinin icraçı direktoru Rəvan Həsənov iştirak edib.
18:37 18.09.2025
Oxunuş sayı: 6041
