Netanyahu Trampa təşəkkür etdi: “Bu qərar tarixin gedişatını dəyişəcək”
İsrailin Baş naziri Benyamin Netanyahu ABŞ Prezidenti Donald Trampın İranın nüvə obyektələrinə zərbə endirmək qərarını alqışlayıb və ona təşəkkürünü bildirib.
Crossmedia.az xəbər verir ki, Netanyahu bu barədə “X” hesabında yayımladığı videomüraciətində çıxış edib.
“Prezident Trampı təbrik edirəm. Sizin İranın nüvə obyektələrinə zərbə endirmək barədə verdiyiniz cəsarətli qərar, ABŞ-nin gücü və ədaləti ilə birlikdə, tarixin axarını dəyişəcək”, – Netanyahu bildirib.
O, həmçinin İsrailin həyata keçirdiyi “Vüsətli Şir” adlı hərbi əməliyyat çərçivəsində artıq ciddi nəticələr əldə olunduğunu qeyd edib.
“Lakin bu gün İranın nüvə obyektələrinə qarşı həyata keçirilən əməliyyatda ABŞ bütün gözləntiləri üstələdi. Bunu Yer üzündə başqa heç bir ölkə bacarmazdı”, – deyə o əlavə edib.
Netanyahu Trampın qərarını tarixi hadisə adlandıraraq, bu addımın unudulmamalı olduğunu vurğulayıb:
“Tarix xatırlayacaq ki, Prezident Tramp dünyanın ən təhlükəli terrorçu rejiminin nüvə silahına sahib olmasının qarşısını almaq üçün hərəkətə keçdi”.
O, çıxışını ABŞ-lə həmrəyliyini ifadə edən sözlərlə yekunlaşdırıb:
“Tramp və mən tez-tez deyirik: "Sülh gücdən keçir. Əvvəl güc, sonra sülh". Bu gün ABŞ həmin gücü nümayiş etdirdi”.
Aybəniz Səfərova
11:57 22.06.2025
Oxunuş sayı: 760
