Xameneiyə yaxın şəxs: “Növbə bizdədir, ABŞ bazaları vurulacaq!”
İranın ali lideri Ayətullah Əli Xameneiyə yaxınlığı ilə tanınan, ölkədə nüfuzlu siyasi fiqur hesab edilən və mühafizəkar “Kayhan” qəzetinin baş redaktoru olan Hüsəyn Şəriətmədari ABŞ-nin Fordodakı nüvə obyektinə endirdiyi hücuma cavab olaraq sərt bəyanatla çıxış edib.
Crossmedia.az xəbər verir ki, Şəriətmədari hücumun cavabsız qalmayacağını vurğulayıb.
O, özünü ali liderin nümayəndəsi kimi təqdim edir və tez-tez Xameneiyə yaxın dairələrin fikirlərini əks etdirən çıxışlarla yadda qalır.
“Amerikanın Fordodakı nüvə obyektinə hücumundan sonra növbə bizdədir. Heç bir tərəddüd etmədən ilk addım kimi ABŞ-nin Bəhreyndə yerləşən Hərbi Dəniz Qüvvələrinə raket zərbələri endirilməli və eyni zamanda Hörmüz boğazı ABŞ, Böyük Britaniya, Almaniya və Fransa gəmilərinin üzünə bağlanmalıdır”, – Şəriətmədari qəzetin bu günkü sayında bildirib.
Qeyd edək ki, “Kayhan” qəzeti çox zaman İranın ali rəhbərliyinin qeyri-rəsmi mövqeyini əks etdirən platforma kimi çıxış edir. Bu kimi açıqlamalar rəsmi bəyanat olmasa da, ölkə daxilində ali rəhbərliyə yaxın dairələrin mümkün strategiyaları barədə ipucu verir.
Aybəniz Səfərova
11:31 22.06.2025
Oxunuş sayı: 8167
