BMT-nin baş katibi: "ABŞ-nin İrana zərbələri regionu uçuruma aparır"
BMT-nin baş katibi Antoniu Quterreş ABŞ-nin İranın nüvə obyektlərinə endirdiyi zərbələrə münasibət bildirib.
Crossmedia.az xəbər verir ki, Quterreş bəyanatında yaranmış vəziyyətdən ciddi narahatlığını ifadə edib və tərəfləri eskalasiyadan çəkinməyə çağırıb.
“Mən ABŞ-nin İrana qarşı güc tətbiqindən son dərəcə narahatam. Bu, artıq uçurumun kənarında olan regionda təhlükəli gərginliyin daha da dərinləşməsinə səbəb olur. Bu hərəkət beynəlxalq sülh və təhlükəsizliyə birbaşa təhdiddir”, – BMT baş katibi vurğulayıb.
Quterreş həmçinin qeyd edib ki, münaqişənin hərbi yolla həll yolu yoxdur:
“İrəliyə aparan yeganə yol diplomatiyadır. Tək ümid sülhdür”.
Xatırladaq ki, ABŞ bu gün İranın Fordo, Nətənz və İsfahan şəhərlərində yerləşən nüvə obyektlərinə hava və raket zərbələri endirib. Hadisə beynəlxalq miqyasda ciddi narahatlığa səbəb olub.
Aybəniz Səfərova
10:14 22.06.2025
Oxunuş sayı: 8289
