Qazaxıstan Karachaganakda qərbli sərmayədarlarla qaz zavodu tikməyəcək
Qazaxıstan hakimiyyəti Karachaganak yatağında qaz emalı zavodunun tikintisi ilə bağlı İtaliyanın Eni və Britaniyanın Shell şirkətlərinin rəhbərlik etdiyi konsorsiumla əməkdaşlıqdan imtina edib.
Crossmedia.az xəbər verir ki, bu barədə "Kazinform" məlumat verib.
Nazirliyin açıqlamasında bildirilir ki, sərmayədarların təklif etdiyi şərtlər iqtisadi baxımdan qəbuledilməz sayılıb. Onların əsas tələblərindən biri – tikinti xərclərinə əlavə olaraq 1 milyard dollar ödəniş və məhkəmə çəkişmələrinin tam dayandırılması olub.
Sərmayədarlar bu tələbləri qaz zavodunun 3–4 il ərzində xərcləri ödəyə bilməyəcəyi ilə izah ediblər. Çünki məhsul bölgüsü sazişi 2033-cü ildə başa çatır.
Nazirlik bildirib ki, layihə üzrə danışıqlar dayandırılıb, lakin yatağın qaz potensialı üzrə işlər davam etdirilir.
Xatırladaq ki, Karachaganak dünyanın ən iri qaz-kondensat yataqlarından biridir. Layihənin operatorları Shell və Eni şirkətləridir (hər biri 29,25% paya sahibdir). Digər iştirakçılar arasında Chevron (18%), LUKoil (13,5%) və KazMunayQaz (10%) yer alır. Hazırda orada hasil olunan qazın böyük hissəsi təkrar yatağa vurulur, qalanı isə emal üçün Rusiyaya Orenburq zavoduna göndərilir.
Hazırda zavodun inşasını KazMunayQaz şirkətinin öz üzərinə götürməsi ehtimal olunur.
Nigar Rəhimova
00:30 22.06.2025
Oxunuş sayı: 700
