Xarici xəbərlər
İrandan Qətərə xəbərdarlıq
İran rəsmiləri bu həftə Qətər hökumətinə xəbərdarlıq ediblər ki, əgər ABŞ İrana hərbi zərbə endirərsə, bölgədəki Amerika hərbi obyektləri, o cümlədən Qətərdəki bazalar hədəf alınacaq.
Crossmedia.az xəbər verir ki, bu barədə "The Washington Post" məlumat yayıb.
Nəşrin yazdığına görə, İranın bu xəbərdarlığı Yaxın Şərqdə artan gərginlik fonunda baş verib. Hazırda bölgədə – İraq, Suriya, İordaniya, Bəhreyn, Küveyt, Birləşmiş Ərəb Əmirlikləri və xüsusilə Qətərdə yerləşən bazalarda on minlərlə ABŞ əsgəri xidmət edir. Qətərin cənub-qərbində, Dohadan 20 mil məsafədə yerləşən Əl-Udeyd hava bazası ABŞ-ın regiondakı ən böyük hərbi bazası hesab olunur. Bu obyekt ABŞ Mərkəzi Komandanlığının (CENTCOM) irəli komanda məntəqəsi kimi fəaliyyət göstərir və burada 10 mindən çox hərbçi yerləşdirilib.
İran rəsmilərinin sözlərinə görə, əgər ABŞ tərəfindən birbaşa hərbi əməliyyatlar həyata keçirilərsə, Fars körfəzindəki ABŞ-a məxsus bütün hərbi obyektlər “qanuni hədəf” olacaq. Bu açıqlama bölgədəki gərgin vəziyyətin daha da dərinləşəcəyinə dair narahatlıqları artırıb.
16:18 20.06.2025
Oxunuş sayı: 9141
