Kraudfandinq qanunu sahibkarlar üçün yeni dövr açır? – İqtisadçıdan AÇIQLAMA
Milli Məclisin plenar iclasında “Kraudfandinq haqqında” qanun layihəsi I oxunuşda qəbul edilib. Layihə səhm və borc əsaslı kraudfandinqin hüquqi əsaslarını müəyyənləşdirir, platforma operatorlarının fəaliyyətini və bu sahədə dövlət nəzarəti mexanizmlərini tənzimləyir. Sənədin əsas məqsədi startapların, mikro, kiçik və orta sahibkarlıq subyektlərinin alternativ maliyyə mənbələrinə çıxışını asanlaşdırmaq, eyni zamanda investorların hüquqlarının daha etibarlı qorunmasını təmin etməkdir.
Yeni qanunun qəbul olunması Azərbaycanda investisiya mühitinin inkişafı baxımından mühüm yenilik kimi qiymətləndirilir. Mütəxəssislərin fikrincə, bu mexanizm həm sahibkarların maliyyəyə çıxış imkanlarını genişləndirə, həm də vətəndaşların müxtəlif layihələrə sərmayə yatırmasını stimullaşdıra bilər. Bununla yanaşı, yeni sistemin effektiv işləməsi üçün şəffaflıq, dövlət nəzarəti və investorların maarifləndirilməsi əsas şərtlərdən hesab olunur.
Mövzu ilə bağlı Crossmedia.az-a danışan iqtisadçı Akif Nəsirli bildirib ki, “Kraudfandinq haqqında” qanun layihəsinin I oxunuşda qəbul edilməsi alternativ maliyyələşmə bazarının formalaşması baxımından mühüm əhəmiyyət daşıyır.
Onun sözlərinə görə, bu mexanizm xüsusilə bank kreditlərinə çıxışda çətinlik yaşayan startaplar, mikro, kiçik və orta sahibkarlıq subyektləri üçün yeni maliyyə imkanları yaradacaq.
“Sahibkarlar layihələrini geniş investor auditoriyasına təqdim etməklə daha çevik şəkildə vəsait cəlb etmək imkanı əldə edəcəklər. İnvestorlar isə kiçik məbləğlərlə perspektivli layihələrə sərmayə qoymaq, investisiya portfellərini şaxələndirmək və innovativ bizneslərin inkişafında iştirak etmək imkanı qazanacaqlar”, – deyə iqtisadçı bildirib.
Akif Nəsirli qeyd edib ki, platforma operatorlarının fəaliyyətinin qanunla tənzimlənməsi və dövlət nəzarətinin tətbiqi bazarda şəffaflığın artmasına, investor hüquqlarının daha etibarlı qorunmasına xidmət edəcək.
İqtisadçı hesab edir ki, yeni mexanizmin üstünlükləri ilə yanaşı, müəyyən riskləri də nəzərə almaq lazımdır.
“Erkən mərhələdə olan bizneslərin uğursuzluq ehtimalı yüksək olduğundan investorlar yatırdıqları vəsaiti qismən və ya tam itirə bilərlər. Buna görə də platformalarda məlumatların tam açıqlanması, risklərin düzgün izah edilməsi və investorların maarifləndirilməsi böyük əhəmiyyət kəsb edir. Sahibkarlar üçün də maliyyə hesabatlılığı, şəffaf fəaliyyət və investorlar qarşısında öhdəliklərin yerinə yetirilməsi kimi yeni tələblər yaranacaq”, – deyə o vurğulayıb.
A.Nəsirlinin fikrincə, qanunun effektiv tətbiqi, güclü nəzarət mexanizmlərinin qurulması və etibarlı kraudfandinq platformalarının formalaşdırılması təmin olunarsa, bu mexanizm Azərbaycanda innovasiya ekosisteminin inkişafına, investisiya mühitinin canlanmasına və sahibkarlığın maliyyələşmə imkanlarının genişlənməsinə mühüm töhfə verə bilər.
Təhminə Abdulrəhimova
15:13 06.07.2026
Oxunuş sayı: 56
