Ekspert: Rəqəmsal iş modelləri bəzi sahələrdə daha səmərəli ola bilər
Müasir əmək bazarında baş verən dəyişikliklər gənclərin karyera seçimlərinə də təsir edir. Artıq bir çox gənc uzunmüddətli, korporativ və ənənəvi karyera pilləkənləri yerinə rəqəmsal sahibkarlıq, freelance fəaliyyət və sürətli maliyyə uğuru vəd edən sahələrə yönəlir. Bu tendensiyanın səbəbləri və mümkün nəticələri ilə bağlı müxtəlif fikirlər səsləndirilir.
Mövzu ilə bağlı Crossmedia.az-a açıqlama verən iqtisadçı ekspert Günay Hüseynova bildirib ki, son illər əmək bazarında baş verən dəyişikliklər gənclərin iş və karyera ilə bağlı gözləntilərinə də təsir göstərib:
“Əslində gənclərin freelance və sürətli maliyyə uğuru vəd edən işlərə yönəlməsinin səbəbi həm sıxıcı iş mühiti həm də işçilərin əksərən özəl sektorda istismarı ilə əlaqədardır. Digər bir səbəb isə həyat şəraitinin dəyişməsi insanların daha çox istirahətə, gəzintiyə ehtiyac duyması ilə əlaqədardır. Məsələn əgər şəxs ona tapşırılan işi 3 saatda həll edə bilirsə və ya kompüter vasitəsi ilə uzaqdan idarə edə bilirsə onun nə 8 saat ofisdə oturmağına nə də məsafə qət edib gəlməyinə ehtiyac yoxdur. Əslində belə olması həm maliyyə baxımından avantajlıdır, həmçinin də şəhərdə tıxacların və əhali sıxlığının qarşısının alınması üçün əhəmiyyətli hesab olunur. Təbii ki, bütün sahələrə aid deyil lakin müəyyən və əksər sahələrdə keçərlidir".
G.Hüseynova qeyd edib ki, sürətli müvəffəqiyyət anlayışı ilə real iqtisadiyyatın tələbləri arasında müəyyən ziddiyyətlər yaransa da, bunun əsas təsirlərindən biri süni intellekt texnologiyalarının inkişafı ilə bağlı ola bilər:
"Rəqəmsal dünyanın gənclərə diqtə etdiyi sürətli müvəffəqiyyət ilə real iqtisadiyyatın tələbləri arasında ziddiyyətə qaldıqda isə süni intellektin inkişafı sadəcə müəyyən problemlər yarada bilər. O da təbii ki işsizlik probleminin biraz daha artmasına səbəbdir. Lakin düşünmürəm ki, psixoloji böhrana səbəb olsun”.
Fatimə Cabbarlı
20:00 16.06.2026
Oxunuş sayı: 64
