4 aya 12 milyon manat - ƏDV geri qaytarılması nəyi göstərir?
Azərbaycanda daşınmaz əmlakın nağdsız qaydada alqı-satqısına görə cəmi 4 ay ərzində vətəndaşlara 12 milyon manatdan çox ƏDV-nin geri qaytarılması dövlətin şəffaf iqtisadiyyat və rəqəmsal ödəniş siyasətinin real nəticələr verdiyini göstərən mühüm göstəricilərdən biridir.
Bu rəqəm bir tərəfdən insanların nağdsız ödənişlərə marağının artdığını, digər tərəfdən isə vergi sistemində vətəndaş məmnuniyyətinin gücləndirilməsi istiqamətində atılan addımların effektiv olduğunu göstərir.
Xüsusilə, daşınmaz əmlak sektorunda bu cür geriödəmə mexanizmləri həm bazarın leqallaşmasına, həm də maliyyə dövriyyəsinin daha şəffaf formada aparılmasına xidmət edir.
Bununla yanaşı, ƏDV geri qaytarılması prosesinin daha operativ, əlçatan və sadələşdirilmiş formada həyata keçirilməsi üçün müəyyən texniki və inzibati təkmilləşdirmələrə ehtiyacın olub-olmaması da aktual müzakirə mövzularından biri olaraq qalır.
Mövzu ilə bağlı Liberal İqtisadçılar Mərkəzinin sədri Akif Nəsirli Crossmedia.az-a açıqlama verib:
“Azərbaycanda 4 ay ərzində nağdsız qaydada daşınmaz əmlak alan vətəndaşlara 12 milyon manatdan çox ƏDV-nin geri qaytarılması ümumilikdə müsbət göstərici hesab oluna bilər.
Bu, ilk növbədə ölkədə nağdsız ödənişlərin genişləndiyini, vətəndaşların rəsmi maliyyə mexanizmlərinə daha çox üstünlük verdiyini göstərir.
Eyni zamanda, daşınmaz əmlak sektorunda şəffaflığın artması və kölgə iqtisadiyyatının azalması baxımından da bu rəqəm diqqətəlayiqdir.
ƏDV geri qaytarılması mexanizmi vətəndaşlarda həm stimullaşdırıcı rol oynayır, həm də satıcıları əməliyyatları rəsmiləşdirməyə sövq edir.
Bu baxımdan, sistem iqtisadi dövriyyənin leqallaşdırılması üçün effektiv alətlərdən biri kimi qiymətləndirilə bilər.
Bununla belə, sistemdə müəyyən təkmilləşdirmələrə ehtiyac olduğu da görünür”.
Ekspert əlavə edib ki, xüsusilə müraciət və geri ödəniş prosesinin daha sürətli və sadələşdirilmiş formada həyata keçirilməsi vacibdir:
“Bəzi hallarda vətəndaşlar prosedurların uzun çəkməsindən və texniki çətinliklərdən narazılıq edirlər. Elektron platformaların daha da təkmilləşdirilməsi, müraciətlərin avtomatik yoxlanılması və vəsaitin daha operativ qaytarılması sistemə etimadı artırar.
Digər vacib məqam isə maarifləndirmədir. Hələ də bir çox vətəndaş daşınmaz əmlak əməliyyatlarında ƏDV geri qaytarılması imkanlarından tam məlumatlı deyil.
Bu istiqamətdə ictimai məlumatlandırmanın gücləndirilməsi həm müraciət sayını artırar, həm də nağdsız iqtisadiyyatın inkişafına əlavə töhfə verər”.
Ayhan
14:28 09.05.2026
Oxunuş sayı: 66
