Cərimənin vaxtında ödənilməməsi sürücülər üçün hansı hüquqi məsuliyyət yaradır?
Yol hərəkəti qaydalarının pozulmasına görə yazılan inzibati cərimələr vaxtında ödənilmədikdə, bu artıq sadəcə borc məsələsi olmaqdan çıxır və sürücülər üçün əlavə hüquqi nəticələr yarada bilir. Son dövrlərdə isə xüsusilə uzun müddət yığılıb qalan cərimələrin sürücülük hüququna təsiri və bunun hansı hallarda məhdudiyyətlərə səbəb ola biləcəyi daha çox gündəmə gəlir. Məsələ həm məsuliyyət, həm də qanunvericiliyin tətbiqi baxımından diqqət mərkəzində qalır.
Vəkillər Kollegiyasının üzvü, hüquqşünas Anar Ramazanov məsələ ilə bağlı Crossmedia.az-a açıqlama verib:
O , Azərbaycan Respublikasının qanunvericiliyinə görə, o cümlədən İnzibati Xətalar Məcəlləsinin tələblərinə əsasən, inzibati xətalarla bağlı cərimə qərarı çıxarılan hər bir fiziki və hüquqi şəxsin həmin cərimə qərarı ilə razı olduğu təqdirdə onu ödəməli olduğunu vurğulayıb: "Razı olmadığı təqdirdə isə həmin cərimə qərarından müvafiq olaraq inzibati orqana və ya məhkəməyə şikayət verməlidir. Əgər hər hansı fiziki şəxsin yol hərəkəti qaydalarını pozması səbəbindən fiziki şəxsə qarşı cərimə ilə bağlı qərar çıxarılmışdırsa, şəxs bu qərarla razılaşdığı təqdirdə onu qanunla müəyyən edilmiş müddətdə ödəmək öhdəliyi daşıyır. Əgər cərimə qərarı vaxtında, qanunla müəyyən edilmiş müddətdə ödənilməzsə, qərarın qüvvəyə mindiyi gündən bir aydan sonra həmin cərimə məbləğinin üzərinə gündəlik 1 % olmaqla dəbbə pulu hesablanır. Dəbbə pulu ən çox iki ay müddətinə hesablanır. Əgər iki ay ərzində müvafiq cərimə ödənilməzsə, o zaman nəqliyyat vasitəsinin saxlanılması və onun duracağa qoyulması ilə bağlı müvafiq qərar qəbul edilir. Ən sonda, əgər cərimə üç ay müddətində ödənilməzsə, üç ay keçdikdən sonra həmin sürücünün, yəni barəsində cərimə qərarı çıxarılmış şəxsin nəqliyyat vasitəsini idarəetmə hüququnun məhdudlaşdırılması ilə bağlı müvafiq qərar qəbul edilir və qərar icraya yönəldilir. Nəqliyyat vasitəsini idarəetmə hüququ haqqında qərar şəxsən sürücülük vəsiqəsinin alınması yolu ilə icra edilir. Əgər şəxs sürücülük vəsiqəsini təqdim etməzsə, bu zaman qanunla müəyyən edilmiş tədbirlərin görülməsi üçün qərar məcburi icra olunması məqsədilə aidiyyəti orqanlara göndərilir.
Lakin İnzibati Xətalar Məcəlləsi eyni zamanda müəyyən edir ki, müvafiq cəriməni və qanunla müəyyən edilmiş digər xərcləri ödəyən şəxs məhkəməyə müraciət edərək nəqliyyat vasitəsini idarəetmə hüququnun məhdudlaşdırılması ilə bağlı qərarın ləğv olunmasını tələb edə bilər".
Hüquqşünas əlavə edib ki, qanunvericiliyimizdə cərimənin tətbiqi, cərimə ödənilmədiyi təqdirdə hansı prosedurların tətbiq olunması, eyni zamanda nəqliyyat vasitəsini idarəetmə hüququnun məhdudlaşdırılması ilə bağlı prosedurlar açıq şəkildə öz əksini tapmışdır və nəqliyyat vasitəsini idarəetmə hüququ məhdudlaşdırılan sürücünün bu qərarın ləğvi ilə bağlı hüquqları təsbit olunmuşdur.
Fatimə
19:54 07.05.2026
Oxunuş sayı: 58
