Azərbaycanın 2030 hədəfləri - yaşıl enerjidə lider ola biləcəkmi?
Azərbaycan Respublikasının Baş naziri Əli Əsədov aprelin 21-də Qazaxıstan Respublikasının Astana şəhərində keçirilən Regional Ekoloji Sammitdə iştirak etmək üçün işgüzar səfərə yollanıb.
Bu səfər fonunda Azərbaycanın son illərdə formalaşdırdığı yaşıl enerji siyasəti və bu istiqamətdə atdığı addımlar xüsusi diqqət çəkir.
Belə ki, ölkə həm regionda bərpa olunan enerji sahəsində lider mövqeyə çıxmağı, həm də karbon emissiyalarını azaltmağı hədəfləyir. Bu kontekstdə sual yaranır: Azərbaycanın yaşıl enerji siyasəti nə ilə xarakterizə olunur və hazırda bu istiqamətdə hansı konkret addımlar atılır?
Mövzu ilə bağlı Milli Məclisin deputatı Vüqar Bayramov Crossmedia.az-a açıqlama verib:
“Azərbaycan regionda yaşıl enerjini daha yaxından dəstəkləyən ölkələrdəndir. Nəzərə alsaq ki, Azərbaycan son illər yaşıl enerji sektoruna 1 milyard dollardan artıq xarici investisiya cəlb edib. Və bu istiqamətdə dünyanın fərqli ölkələri ilə əməkdaşlıq olunur, o cümlədən Körfəz ölkələri, Çin və bir sıra digər ölkələrlə. Azərbaycan yaşıl enerji istehsalında dayanıqlı və uzunmüddətli əməkdaşlıq forması qurub.
Eyni zamanda, ABŞ ilə imzalanan strateji əməkdaşlıq xartiyasından sonra ABŞ ilə də yaşıl enerji sahəsində əməkdaşlığın güclənəcəyi gözlənilir.
O baxımdan, Azərbaycan regionda yaşıl enerji infrastrukturu formalaşdıran və bu istiqamətdə yeni investisiyalar cəlb edən ölkələrdəndir.
Digər tərəfdən də, Qarabağ və Şərqi Zəngəzur işğaldan azad olunmuş ərazilərimiz yaşıl zona elan olunub. Bu da təbii ki, həmin təcrübə baxımından kifayət qədər spesifik bir yanaşmadır. Bu kontekstdə biz Azərbaycanın regional ölkələr üçün tətbiq edilə biləcək kifayət qədər təcrübəsinin olduğunu görürük”.
Deputat əlavə edib ki, eyni zamanda, bəlli hədəflər var və 2030-cu ilə qədər Azərbaycan yaşıl enerjinin ümumi enerji balansındakı payını 35%-ə qədər artırmaq niyyətindədir.
Karbon emissiyasının 40%-ə qədər azaldılması hədəflənir və bütün bunlar onu göstərir ki, Azərbaycan yaşıl enerji sahəsində regionda aparıcı ölkələrdən biridir”.
Ayhan
13:58 23.04.2026
Oxunuş sayı: 49
