Müharibənin gizli təsirləri - iqtisadiyyatlar necə xilas ediləcək?
Yaxın Şərqdə davam edən münaqişələrin yaratdığı humanitar və iqtisadi fəsadlar beynəlxalq maliyyə institutlarını daha çevik və operativ addımlar atmağa vadar edir.
Bu kontekstdə Dünya Bankı tərəfindən inkişaf etməkdə olan ölkələrə maliyyə vəsaitlərinin sürətləndirilmiş qaydada ayrılması mexanizmlərinin tətbiqi ilə bağlı planların açıqlanması xüsusi diqqət çəkir.
Məqsəd təkcə dağıntıların aradan qaldırılması deyil, həm də zərər görmüş iqtisadiyyatların bərpasına və sosial sabitliyin təmin olunmasına dəstək verməkdir.
Bu isə mühüm bir sualı gündəmə gətirir: münaqişələrin doğurduğu nəticələrin aradan qaldırılması üçün hansı maliyyə və institusional mexanizmlər daha effektiv hesab oluna bilər və bu prosesdə beynəlxalq qurumların rolu nə dərəcədə həlledici olacaq?
Mövzu ilə bağlı ReAl partiyasının sədri Natiq Cəfərli Crossmedia.az-a açıqlama verib:
"Dünya Bankının əsas mexanizmləri maliyyələşmə, xüsusilə də, kreditlərin verilməsi üzərində qurulub. Əvvəllər inkişaf etməkdə olan və nisbətən az inkişaf etmiş ölkələr kredit üçün müraciət etdikdə, bu müraciətlərin baxılma prosedurları daha sərt və uzunmüddətli olurdu.
Lakin hazırda ərzaq çatışmazlığı ilə bağlı mümkün risklərin artması fonunda Dünya Bankı bu sahədə müəyyən dəyişikliklər edib.
Belə ki, kredit müraciətlərinə daha operativ və daha müsbət yanaşmaq məqsədilə qərarvermə mexanizmlərində yumşalmaya gedilib.
Bu dəyişikliklərin əsas səbəbi ondan ibarətdir ki, xüsusilə, Asiya və Afrika ölkələri mövcud müharibələr, yanacaq böhranı və potensial ərzaq qıtlığı səbəbindən ciddi iqtisadi çətinliklərlə üzləşə bilərlər.
Bu baxımdan, həmin regionlara aid ölkələrin kredit müraciətlərinə daha qısa müddətdə baxılması və onların maliyyə resurslarına çıxışının asanlaşdırılması gözlənilir".
Ayhan
10:00 30.03.2026
Oxunuş sayı: 58
