Qarabağ və Şərqi Zəngəzur - iqtisadi aktivliyin yeni ünvanı
İşğaldan azad edilmiş ərazilərdə həyatın bərpası prosesi artıq yeni və daha dinamik mərhələyə qədəm qoyub.
Uzun illərin fasiləsindən sonra bu torpaqlara dönüş təkcə keçmiş məcburi köçkünlərin geri qayıdışı ilə məhdudlaşmır, eyni zamanda genişmiqyaslı quruculuq və inkişaf strategiyasının real nəticələrini özündə əks etdirir.
Regionda formalaşan yeni sosial-iqtisadi mühit, dövlətin məqsədyönlü siyasəti və həyata keçirilən kompleks layihələr bu əraziləri yenidən ölkənin ən fəal inkişaf zonalarından birinə çevirir.
Artıq minlərlə insanın məskunlaşdığı və fəaliyyət göstərdiyi bu ərazilər, müxtəlif sahələr üzrə peşəkar kadrların cəlb olunduğu, müasir infrastrukturun qurulduğu və ictimai həyatın canlandığı bir məkana çevrilməkdədir. Bu reallıq isə təkcə demoqrafik artımı deyil, həm də davamlı inkişafın və strateji dirçəlişin bariz göstəricisi kimi çıxış edir.
Məsələ ilə bağlı Milli Məclisin deputatı Nəsib Məhəmməliyev Crossmedia.az-la öz fikirlərini bölüşüb:
"Qarabağa Böyük Qayıdış proqramı uğurla icra olunmaqdadır. Aydındır ki, 30 illik erməni işğalı zamanı böyük bir ərazidə şəhərlər, kəndlər yerlə-yeksan olmuş, infrastruktur tamamilə dağıdılmış, yaşayış üçün minimum imkanlar belə qalmamışdı. Müharibədən və məlum anti-terror əməliyyatlarından sonra, dövlətimizin ayırdığı milyardlarla vəsait və şəxsən Prezident İlham Əliyevin gündəlik fəaliyyəti nəticəsində iri maliyyə tutumlu infrastruktur layihələri icra olundu.
Magistral yollar, tunellər, körpülər, beynəlxalq hava limanları, elektrik stansiyaları, inzibati və yaşayış binaları, tədris-təlim müəssisələri, mədəniyyət, səhiyyə obyektləri, sənaye-emal müəssisələri, müalicə-istirahət mərkəzləri, hərbi hissələr və s. inşa olundu.
Artıq, keçmiş məcburi köçkünlərlə yanaşı, işğaldan azad olunmuş ərazilərin bərpasında iştirak edən şirkətlərdə və yaxud müxtəlif dövlət orqanlarında çalışan işçilərin sayı 80 mini ötmüşdür.
Bu rəqəm demək olar ki, hər gün artır. Şəhərlərdə, kəndlərdə insanların normal yaşayış şəraiti təmin edildikcə, öz yurdlarına qayıdanların sayı da artacaqdır. Soydaşlarımızın öz yurdlarına qayıtması, dövlətimiz üçün, milli təhlükəsizlik baxımından strateji məsələdir.
Dövlət başçımızın regiona sıx-sıx səfərləri, görülən işlərə şəxsən nəzarət etməsi, işin keyfiyyətinə nəzarət etməsi, orada çalışan insanların məsuliyyətini artırır. Digər tərəfdən, böyük bir ərazi minalardan təmizlənir. Kənd təsərrüfatı məhsullarının istehsalı və turizm sektorunun inkişafı üçün münbit şəraitə malik Qarabağ və Şərqi Zəngəzur iqtisadi rayonlarının iqtisadi aktivliyi ölkə iqtisadiyyatına əhəmiyyətli qatqı verəcəkdir. Bu da, dünyada və regionda gedən müharibələr zəminində olduqca vacib amillərdəndir. Düşünürəm ki, indiki templə, yaxın 3-4 il ərzində keşmiş məcburi köçkünlərin tam əksəriyyəti öz yurdlarına qayıda biləcəklər".
Elmir Heydərli
16:17 24.03.2026
Oxunuş sayı: 64
