Azərbaycanda qiymətlər artacaq, inflyasiya gözlənilir - Proqnoz
Yaxın Şərqdə artan gərginlik qlobal enerji bazarına təsir göstərib. Hörmüz boğazında ticarət gəmiçiliyinin demək olar ki, dayanması enerji təchizatı ilə bağlı narahatlıqları artırıb. Eyni zamanda, Qətərə məxsus mayeləşdirilmiş təbii qaz (LNG) obyektində istehsalın dayandırıldığı bildirilir. Bu vəziyyət Avropa bazarında qaz təchizatı ilə bağlı riskləri gücləndirib. Nəticədə Avropada qazın qiyməti sürətlə artmağa başlayıb.
Bu barədə Crossmedia.az-a danışan iqtisadçı ekspert Pərviz Heydərov qeyd edib ki, neftin qiyməti artıq 100 dolları keçib, qazın qiyməti isə qalxıb:
“Yəni enerji bazarında bütün qiymətlərin artdığı qeydə alınıb. Hazırda enerji bazarında bir qarışıqlıq müşahidə olunur. Həmin prosesin Azərbaycana və digər region ölkələrinə təsiri məsələsinə gəldikdə, Azərbaycan müharibə gedən əraziyə yaxın olsa və gərginlik getsə də, bizim enerji resurslarımıza, yəni neft hasilatımıza, qaz tədarükümüzə, onların tranzit yolu ilə Avropaya çatdırılmasına real təhlükə yoxdur”.
Ekspertin sözlərinə görə, Yaxın Şərqdəki bir çox neft ölkələrində artıq baş verən hadisələr nəticəsində onların neft hasilatına və qaz tranzitinə, məsələn, Qətər qaz səviyyəsinə ciddi ziyan var:
“Onların infrastrukturu zədələnib. Onlar başqa vasitələrlə hasilatı azaltmaq məcburiyyətində qala bilərlər. Bunun nəticəsi isə dünyada qiymətlərin artmasına səbəb olur. Azərbaycanda təəssüf ki, qiymətlərin qalxmasını idxal edən ölkələr də var. Onlar enerji, xüsusən də qiymətin qalxmasını bilən bazarlarda enerji daşıyıcılarının qiymətini qaldırır, bahalaşma yaradır.
Nəzərə alsaq ki, ölkəmizin daxili istehlak bazarı kənardan asılı vəziyyətdədir, deməli bu, bizdə qiymətlərin qalxmasına, inflyasiyaya səbəb ola bilər. Yəni nə qədər çox bir tərəfdən gəlir götürsək də, digər tərəfdən ölkə iqtisadiyyatının bir hissəsinin müəyyən təsirlərə məruz qalması da mümkündür. Bunlar ölkə daxilində bahalaşma yaradır”.
Fatimə Məmmədova
14:08 10.03.2026
Oxunuş sayı: 1806
