Makroiqtisadi sabitliklə bağlı təhlükə var?: Mərkəzi Bank tədbir görür
Azərbaycanda makroiqtisadi sabitliyin qorunması məqsədilə həyata keçirilən pul-kredit siyasəti 2026-cı ildə də ehtiyatlı yanaşma ilə davam etdiriləcək. Beynəlxalq analitik qurum Fitch Solutions tərəfindən yayımlanan qiymətləndirmələrə görə, ölkənin monetar siyasətində əsas prioritet inflyasiya risklərinin nəzarətdə saxlanılması və maliyyə sabitliyinin təmin olunmasıdır. Bu çərçivədə faiz dərəcələrinin tənzimlənməsi və valyuta sabitliyinin qorunması iqtisadi siyasətin əsas istiqamətlərindən biri kimi çıxış edir.
Hesabatda qeyd olunur ki, Azərbaycan Mərkəzi Bankı əsas faiz dərəcəsini mərhələli şəkildə azaltmaqla iqtisadi aktivliyi dəstəkləməyi hədəfləyir, eyni zamanda manatın məzənnəsinin sabit saxlanılması üçün idarə olunan valyuta siyasətini davam etdirəcək. Analitiklərin fikrincə, intervensiyalar vasitəsilə milli valyutanın məzənnəsinin qorunması və faiz dəhlizi üzrə qərarların ardıcıl şəkildə tənzimlənməsi ölkədə uzunmüddətli makroiqtisadi sabitliyə sadiqliyin göstəricisi kimi qiymətləndirilir.Məsələ ilə bağlı iqtisadçı ekspert Rəşad Həsənov Crossmedia.az-la öz fikirlərini bölüşüb:
"Ümumilikdə götürdükdə, hesab edirəm ki, təkcə 2026-cı ildə deyil, 2027-ci ildə də Mərkəzi Bank mövcud pul-kredit siyasətini davam etdirməyə çalışacaq. Təbii ki, geosiyasi konyunkturada və eyni zamanda Azərbaycanın daxili iqtisadi siyasətində kəskin dəyişikliklər baş vermədiyi, fundamental islahatlar həyata keçirilmədiyi təqdirdə, Mərkəzi Bankın cari siyasət kursunu qoruyub saxlaması zəruri xarakter daşıyacaqdır.
Pul siyasəti ilə bağlı verilən rəsmi mesajlara, eləcə də uçot dərəcəsi üzrə qəbul olunan qərarların məzmununa nəzər yetirdikdə bu yanaşmanın aydın şəkildə müşahidə olunduğu görünür. Mövcud şərtlər daxilində Azərbaycanda yumşaq və ekspansiv pul siyasətinin tətbiqi imkanları hələlik məhdud olaraq qalır. Buna görə də monetar siyasət, formalaşan iqtisadi təzyiqlər və milli valyutanın məzənnəsinin sabitliyinin qorunması kimi amillər nəzərə alınmaqla həyata keçirilmək məcburiyyətindədir.
Bu baxımdan, Fitch Solutions tərəfindən təqdim olunan yanaşmanın 2026-cı il üçün aktual olduğu qənaətindəyəm və böyük ehtimalla bu siyasət kursunun 2027-ci ildə də davam etdirilməsinə cəhd göstəriləcək".
Elmir Heydərli
09:16 25.02.2026
Oxunuş sayı: 554
