Zərərli keçidlər bloklansa da, təhlükə sovuşmayıb
Rəqəmsallaşmanın sürətləndiyi, dövlət idarəçiliyindən tutmuş gündəlik sosial münasibətlərə qədər bütün sahələrin informasiya texnologiyalarına söykəndiyi müasir dövrdə kibertəhlükəsizlik milli təhlükəsizliyin ayrılmaz tərkib hissəsinə çevrilmişdir. İnternet mühitində yayılan zərərli keçidlər, fişinq hücumları, virus və zərərverici proqramlar təkcə fərdi istifadəçilər üçün deyil, həm də dövlət qurumları və strateji infrastrukturlar üçün ciddi risklər yaradır. Bu baxımdan, dövlət səviyyəsində qurulan mərkəzləşdirilmiş müdafiə sistemləri və qabaqlayıcı mexanizmlər informasiya təhlükəsizliyinin təmin edilməsində həlledici rol oynayır.
Azərbaycan Respublikasında informasiya təhlükəsizliyinin gücləndirilməsi istiqamətində son illər ərzində ardıcıl və məqsədyönlü islahatlar həyata keçirilir.
Xüsusilə dövlət qurumlarının vahid şəbəkəsi olan “AzStateNet” üzərindən tətbiq edilən müasir təhlükəsizlik həlləri, mərkəzi antivirus və “Sandbox” texnologiyaları ölkənin kibermühafizə imkanlarını əhəmiyyətli dərəcədə artırıb. Məhz bu sistemli tədbirlərin nəticəsidir ki, 2026-cı ilin yanvar ayı üzrə açıqlanan statistik göstəricilər əvvəlki illə müqayisədə zərərli keçidlərin və təhlükəli elektron sənədlərin bloklanmasında ciddi azalma qeydə alındığını ortaya qoyur.
Məsələ ilə bağlı İKT üzrə mütəxəssis Mirakif Babayev Crossmedia.az-la öz fikirlərini bölüşüb: "Bu, olduqca çox müsbət bir haldır. Bu nəticənin əldə olunması üçün müvafiq qurumlar dayanmadan fəaliyyətdədirlər. Qeyd edim ki, 68 faix böyük bir nəticədir. Bununla belə təhlükə tam sovuşmayıb. Statistikaya görə "AzStateNet" şəbəkəsi üzrə 14 milyon 795 min zərərli keçid bloklanmış burdan belə nəticəyə gəlirik ki, zərərli keçidlərin sayı çoxdur və bu davam etməkdədir. Təbiidir ki, bu istiqamətdə təxirəsalınmaz işlər görülməkdədir".
Elmir Heydərli
17:32 13.02.2026
Oxunuş sayı: 684
