Səhiyyə Nazirliyi yoxlamalara başladı: özəl klinikalar bağlanacaq
2026-cı ilin yanvar ayında Səhiyyə Nazirliyinin Analitik Ekspertiza Mərkəzi tərəfindən özəl tibb müəssisələrində aparılan yoxlamalar səhiyyə sahəsində mövcud problemlərin aktuallığını bir daha gündəmə gətirib. Məlumata görə, ümumilikdə 21 özəl tibb müəssisəsində yoxlama keçirilib, onlardan 11-i planlı, 10-u isə plandankənar yoxlama olub və nəticədə 18 nöqsan faktı aşkarlanıb. Bu göstəricilər səhiyyə müəssisələrində xidmət keyfiyyəti, nəzarət mexanizmləri və qanunvericiliyin icrası məsələlərinin daha ciddi şəkildə diqqətdə saxlanılmasının vacibliyini göstərir. Mövcud nöqsanların aradan qaldırılması üçün hansı tədbirlərin görülməli olduğu, eləcə də səhiyyə sistemində mövcud boşluqların nədən ibarət olduğu isə hazırda müzakirə olunan əsas məsələlərdən biridir.
Məlum olduğu kimi, səhiyyə cəmiyyətin ən strateji əhəmiyyətli sahələrindəndir. Bu isə o deməkdir ki, təkcə öz sağlamlığımıza diqqət kifayət deyil, həm də səhiyyə sistemi təkmilləşdirilməli, inkişaf etdirilməlidir. Mövcud vəziyyət və nöqsanlar isə göstərir ki, vəziyyət ürəkaçan deyil.
Bu barədə Crossmedia.az-a danışan Milli Məclisin Səhiyyə Komitəsinin üzvü Müşfiq Məmmədli deyib ki, hər il görüləcək işlər planına uyğun olaraq Səhiyyə Nazirliyinin Analitik Ekspertiza Mərkəzi tərəfindən planlı yoxlamalar həyata keçirilir: "Bununla yanaşı, vətəndaş müraciətləri əsasında, konkret hüquq pozuntusu aşkar olunduqda və ya hər hansı problem müşahidə edildikdə plandan kənar yoxlamalar da aparılır. Çünki yoxlamaların vahid reyestri mövcuddur və yoxlamaların aparılması üçün bu məsələlər əvvəlcədən müəyyənləşdirilir, planlı yoxlamalar həmin reyestrdə qeyd olunur. Bu da sahibkarlıq fəaliyyətinin təşkili və Azərbaycan dövlətinin sahibkarlıq üçün yaratdığı imkanların bir nümunəsi hesab olunur. Lakin qeyd olunduğu kimi, bəzi sahələr vardır ki, sahibkarlıq sahəsində yoxlamaların dayandırılması ilə bağlı qanunvericilik müddəaları bu sahələrə şamil edilmir. Bu sahələrdən biri də səhiyyədir. Çünki insan sağlamlığı və vətəndaşların sağlam həyat tərzi üçün səhiyyə xüsusi əhəmiyyət daşıyır. Bu səbəbdən həm planlı, həm də konkret faktlar əsasında həyata keçirilən plandan kənar yoxlamalar mövcuddur. Hesab edirəm ki, bu istiqamətdə proseslərin davam etdirilməsi həm özəl, həm də dövlət sektorunda qarşılıqlı şəkildə bir-birini tamamlayan və sağlam rəqabəti formalaşdıran mexanizmin tənzimlənməsinə xidmət edir".
Deputat əlavə edib ki, eyni zamanda, bu yanaşma vətəndaşların sağlamlığının qorunmasında da mühüm rol oynayır: "Çünki insan sağlamlığı elə bir anlayışdır ki, burada özəl və ya dövlət sektoru arasında fərq olmamalıdır — hər bir müəssisə keyfiyyətli və qanunvericiliyə uyğun xidmət göstərməlidir. Düşünürəm ki, bu sahədə monitorinqlər daha da artırılmalı, tibb müəssisələrinin daxili nəzarət və monitorinq xidmətləri gücləndirilməlidir. Müəssisələr qanun pozuntularının, protokol pozuntularının, müalicədə yol verilən çatışmazlıqların qarşısının alınmasında və vətəndaşlara keyfiyyətli xidmət göstərilməsində özləri daha maraqlı olmalıdırlar. Bununla yanaşı, dövlət orqanları tərəfindən də davamlı nəzarət təmin edilməlidir".
Ayhan
10:57 06.02.2026
Oxunuş sayı: 1715
