Partiya sədri qaz təchizatındakı problemlərdən danışdı: Rəsmi qurumlar izah verməlidir
Tanınan iqtisadçı, bank məsələləri üzrə ekspert Əkrəm Həsənov iddia edib ki, Əhmədli qəsəbəsində qaz təchizatı zəifdir. O, bu barədə özünün sosial şəbəkə hesabında yazıb: "Havalar soyuyandan binamızda (Əhmədlidə)qaz təchizatı zəifləyib. İndi bilmirəm : xaricə çox qaz satırlar deyə özümüzə çatmır, yoxsa bizi artıq alışdırmağa çalışırlar ki,bir müddətdən sonra çoxmənzilli binalarda ümumiyyətlə qaz olmayacaq?".
Adətən bu problem hər il yaşanır. Qış gəlir, havalar soyuyur, amma qaz təchizatı təmin olunmur. Bu isə haqlı narazılığa səbəb olur.
Bu barədə Crossmedia.az-a danışan iqtisadçı - ekspert, REAL partiyasının sədri Natiq Cəfərli söyləyib ki, dövlət və rəsmi qurumlar məsələ ilə bağlı izah verməlidir: "Çünki dövlətin vəzifəsi və atacağı addımlar ölkə əhalisinin təminatına xidmət etməlidir. Enerji daşıyıcıları, o cümlədən qazın tam ixracı məsələsi bu baxımdan ciddi şəkildə düşünülməlidir. Ölkə daxilində qazın qiyməti də ucuz deyil. Belə baxanda, Gürcüstana ixrac etdiyimiz qazın qiymətləri ilə dövlət xətti ilə tətbiq olunan daxili tariflər demək olar ki, eyni səviyyədədir. Hətta limiti keçdikdən sonra əhali daha yüksək məbləğ ödəməli olur. Buna görə də ixracın artmasının daxildə tələbatın ödənilməsinə ciddi təsir etdiyini düşünmürəm. Çünki ixracla bağlı son dövrlərdə kəskin addımlar atılmayıb, bu gün üçün ciddi artım müşahidə olunmur. Azərbaycan digər ölkələrə qaz satışı ilə bağlı yeni öhdəliklər götürür və yeni müqavilələr bağlanır. Bu müqavilələrin böyük əksəriyyəti 2026-cı ilin əvvəlindən və 2027-ci ilin sonlarından etibarən ixracın artmasını nəzərdə tutur. Əsas səbəb isə, yəqin ki, daxili tələbatın artmasıdır. Həm əhali sayının artması, həm də Qarabağda iri qəsəbə, kənd və şəhərlərin salınması bunu şərtləndirir. Əvvəllər işğal altında olan bölgələrimizdə ümumiyyətlə qaz təminatı yox idi. İndi isə Xankəndi, Şuşa və digər şəhərlərin qazla təmin olunması ölkə daxilində əlavə tələbat yaradıb".
O, bildirib ki, qaz hasilatınsa əvvəlki illərlə müqayisədə kəskin artım müşahidə olunmur, əksinə, hasilat çox kiçik addımlarla artır: " Bu da onu göstərir ki, yeni yataqların istismara verilməsini gözləmək lazım gəlir. Rəsmi şəxslər də bildirirlər ki, qaz hasilatında artımın əsasən 2029-cu ildən sonra gözlənilməsi mümkündür. Azərbaycanın üzərinə götürdüyü öhdəliklər artdıqca, gələcəkdə bəzi bölgələrdə qaz təchizatı ilə bağlı problemlər yaşana bilər. Məsələn, qazla işləyən modul tipli elektrik stansiyalarına qaz verilişi dayandırıla və qənaət olunan qaz ixraca yönəldilə bilər. Daxildəki problemlər isə daha çox köhnə infrastruktur və bu sahənin düzgün təşkil olunmaması ilə bağlıdır. Qaz sahəsində fəaliyyət göstərən qurumlar daha çox öz səlahiyyətlərini qorumağa çalışır, vətəndaş qarşısında məsuliyyət isə yetərli deyil. Çünki biz vətəndaş olaraq qazın ödənişini vaxtında etməsək, qazımız dərhal kəsilir. Amma dövlət şirkətinin günahı ucbatından qaz ala bilmədikdə, bunun qarşılığında vətəndaşa heç bir kompensasiya verilmir. Bütün bunlar daxili bazarda tənzimlənə biləcək yeni qaydaların tətbiqinə ehtiyac olduğunu göstərir. Bu sahədə həm qanunvericilik təkmilləşdirilməli, həm də şirkətlərin vətəndaş qarşısında məsuliyyəti artırılmaldır".
Röya Məmmədova
14:47 15.12.2025
Oxunuş sayı: 1184
