Zəfər PocketQube peykinin orbitə buraxılması Azərbaycanın kosmik texnologiyalarında yeni mərhələ açır
“Zəfər” adlı PocketQube tipli miniatür peykin orbitə çıxarılması, Azərbaycanın kosmik sektorunda texniki əsasların formalaşdırılması baxımından mühüm əhəmiyyət daşıyır. PocketQube ölçüsünün (5×5×5 sm) kiçikliyi onun böyük kosmik missiyaların tələb etdiyi yüksək keyfiyyət və uzunömürlülük standartlarına cavab vermədiyini göstərsə də, bu tip peyklər orbitə çıxarılma xərclərini kəskin azaltmaq və kosmik komponentləri minimal maliyyə riski ilə sınaqdan keçirmək üçün ideal platformadır.
Bu sözləri Crossmedia.az-a açıqlamasında İT mütəxəssisi Elvin Abbasov “Zəfər” peykinin buraxılışının əhəmiyyəti barədə danışarkən deyib.
Onun sözlərinə görə, PocketQube formatı sənaye səviyyəli böyük missiyalar üçün deyil, əsasən elmi-tədqiqat və təhsil-inkişaf (R&D) mərhələləri üçün nəzərdə tutulur ki, bu da layihənin kommersiya dəyərindən daha çox kadr hazırlığı baxımından faydalı olduğunu göstərir.
"Azərbaycan üçün bu tip kiçik və ucuz peyk texnologiyalarının inkişafı kosmik kadr potensialının formalaşdırılması və milli texnoloji baza yaradılması baxımından strateji əhəmiyyətə malikdir. Miniatür peyklər böyük peyk layihələrindən fərqli olaraq, sürətli prototipləşdirmə və daha az maliyyə itkisi ilə təcrübə qazanmağa imkan verir.
Uzunmüddətli perspektivdə bu texnologiya iqlim monitorinqi, kənd təsərrüfatında məlumat toplama və digər sahələr üzrə xüsusi funksiyalı kiçik peyk qruplarının (constellations) yaradılması üçün baza rolunu oynaya bilər. Bu isə Azərbaycanın xarici peyk məlumatlarından asılılığını azaltmaq potensialı daşıyır".
Nihat Tahirov
10:14 04.12.2025
Oxunuş sayı: 1926
