Professor millət vəkili ilə razılaşmadı: Azərbaycanda qadın sahibkarlığın inkişafı...
Dünya iqtisadiyyatı və Azərbaycan (Layihənin müəllifi Rüfət Quliyevdir)
Azərbaycanda qadınların biznesdə təmsilçiliyi hələ də istənilən səviyyədə deyil. Milli Məclisin deputatı Vüqar Bayramovun sözlərinə görə, ölkədə sahibkarların 33 %-i qadın olsa da, onların kiçik və orta sahibkarlıqda payı xeyli aşağıdır. Deputat bildirib ki, qadınların xüsusilə orta sahibkarlıqda fəaliyyətinin genişləndirilməsi vacibdir.
Bu göstəricilər qadınların biznesdə irəliləməsi üçün daha sistemli dəstəyin lazım olduğunu göstərir. Qadın sahibkarların sayı artsa da, onların KOB sektorunda zəif təmsil olunması inkişafın qeyri-bərabər olduğunu göstərir. Bu boşluğu doldurmaq üçün daha real imkanlar və praktiki təşviqlər yaradılmalıdır.
Sahibkarlıq sahəsində qadınların payının azlığı və bu göstəricini artırmaq yolları barədə Milli Məclisin dörd çağırış deputatı (III, IV, V, VI), iqtisad elmləri doktoru, professor Rüfət Quliyev Crossmedia.az-a danışıb.
O bildirib ki, qadın sahibkarlar biznesdə nizam-intizamlıdır və onların iştirakının artması ölkədə sahibkarlığın inkişafına töhfə verir: "Qadınların fəaliyyəti sahibkarlıqda kifayət qədər yüksəkdir. Səkkiz ildir müəllifi olduğum "Sahibkar saatı" verilişinin indiyə qədər 350-yə yaxın qonağı olub. Onların təxminən yarısı qadınlar olub. Qadın sahibkarların artım tempi kişi sahibkarların artım tempindən çoxdur. Azərbaycanda qadın sahibkarlığına heç bir rəsmi məhdudiyyət yoxdur. Hətta deyərdim ki, müəyyən qədər dövlət strukturlarında, məmurlarda belə bir fikir var ki, qadınlar daha nizam-intizamlıdır, işlərini daha yaxşı qururlar. Həqiqətən də, əgər bağlanan, yəni müflis olan sahibkarlıq fəaliyyətinə baxsaq, onun çox az hissəsi qadınlar tərəfindən idarə olunur. Açılan biznes layihələrinə — istər mikro, istər kiçik, istər orta — daha çox kişi sahibkarlarında rast gəlinir".
O bildirib ki, qadın sahibkarlar daha diqqətlidirlər, addımlarını daha çox ölçüb- biçirlər: "Ola bilər ki, son bir ilin içində müəyyən taktiki dəyişikliklər baş verib, amma qadın sahibkarlığı kifayət qədər artıb və inkişaf edir. Bir məsələni də qeyd edək ki, müsəlman adətlərinə görə qadınlar, qızlar çox vaxt iş görməyə ehtiyat edirlər, xüsusən ailəli olanlar. Amma yenə də bu rəqəmin bu qədər azalmasına mən güman etmirəm".
Ülvi Zahidov
11:58 20.11.2025
Oxunuş sayı: 1588
